A s’invasioni russa de s’Ucraina is Stadus ocidentalis ant fatu sighiri una filera de penas contra a sa Rùssia. Funt provedimentus chi tenint sa tarea de ferri s’economia de sa Rùssia po cumbinci is ghiadoris suus a firmai s’invasioni.
Mancai unu pagu diferentis, is penas chi ant stabiliu is Stadus Unius, s’Unioni Europea e àterus Stadus comenti su Rènniu Uniu, su Cànada e su Giaponi, ferrint is matessis setoris de s’economia russa e, po immoi, ndi lassant stai àterus.
Pighendi in consìderu is penas de is Stadus Unius e de s’Unioni Europea, bieus chi is primas ddas ant postas po proibiri totu is relatas commercialis cun is provìncias de Donetsk e de Luhansk, est a nai cussas provìncias chi decrarendi-sì indipendentis de s’Ucraina ant ingendrau s’invasioni russa. Una segunda truma de penas funt personalis e ferrint unus cantu de polìticus, militaris e funtzionàrius russus e atendit s’arrocu de totu is propriedadis insoru me is Stadus stràngius. Custus provedimentus ant fertu puru totus cussus chi faint parti de su Consillu po sa Seguresa e casi totus cussus chi faint parti de sa Duma, est a nai su Parlamentu russu. Cun una decisioni forti meda s’Unioni Europea at fertu cun custa pena Putin puru.
Sa de tres trumas de penas pertocant su sistema de is bancas russas. Su patrimòniu in Europa e me is Stadus Unius de is bancas russas prus de importu, est a nai su 70% de totu su sistema, dd’ant arrocau. In prus, in totu Europa is bancas no ant a podi arriciri depòsitus prus artus de 100 milla èurus de parti de citadinus russus. Àteras penas ddas ant postas apitzus de is Tìtulus de Stadu russus, poita ca no at a fai prus a ddus comparai.
In contu de cummèrciu is penas pertocant s’arrocu de is esportatzionis in Rùssia de benis tennològicus de importu in setoris comenti s’arionàtica, su spàtziu, sa defensa, sa seguresa, s’arrefinadura de su petròliu. Po immoi, mancai nd’apant arrexonau meda, s’Unioni Europea e is Stadus Unius no funt arribaus a nci bogai totu is bancas russas de su sistema Swift, est a nai su sistema chi impreant is bancas po averiguai s’identidadi de is àteras bancas po dispaciai o arriciri is pagamentus. Bogai is bancas russas de su Swift iat a bolli nai chi no iat a fai prus a fai pagamentus internatzionalis cun sa Rùssia. Ma custu iat a firmai puru is pagamentus de su gasu e de aici no iat a fai a dd’importai de sa Rùssia in Europa.
Is penas, comenti imparant is esperièntzias de su tempus passau, no ant a essi profetosas luegu e at a essi difìcili chi arrennèsciant a firmai s’invasioni de s’Ucraina. Su profetu insoru dd’eus a biri mellus in su benidori.
Massimiliano Meloni
