In custus mesis me is stantis de is butegas seus oramai acostumaus a biri prètzius fora de sentidu. A pagu serbint is tentas de su guvernu po cumbati sa crèscia de is prètzius cun ainas comenti “is tres mesis contras a s’inflatzioni” ca is prètzius, comenti bieus, abarrant artus. Ma sigumenti su consumadori est abistu, est incarrerendi sèmpiri de prus a scerai intra butegas diferentis e a pigai is produtus, candu cumbenint, me is butegas chi proponnint is ofertas prus bellas. Cust’arrexonu ballit, podeus nai, po totu is produtus alimentaris ma ndi ddoi at unu chi mancai ddu circhint in milla butegas, dd’ant a agatai sèmpiri cun is matessis prètzius: s’ollu de olia. Chi fintzas a s’annu passau un’ampulla de ollu de olia s’agatàt a partiri de ses èurus in susu e me is butegas de is trumas cummercialis mannas fiat fàcili a agatai soventi ofertas chi ddu bendiant fintzas asuta de cuàturu èurus, oi no est prus deaici.
In s’ùrtimu annu is prètzius, segundu is datus de Il Sole 24 Ore, funt crèscius de su 37%. Sa curpa no est sceti de s’inflatzioni chi at fertu totu is produtus alimentaris, ca po s’ollu de olia is arrexonis funt àteras puru. Sa produtzioni de olias est calada in totu su mundu po nexi de is giambamentus climaticus. Tocat a arregordai difats chi sa mata de olia crescit in zonas fertas meda de su sicori e de s’artziada de is temperaduras. In Ispànnia, chi est su primu produtori mundiali, sa produtzioni de ollu est calada de 1,8 millionis de tonnelladas in s’annada 2018-2019 a 663 milla tonnelladas in s’annada 2022-2023. A is olivàrius ispanniolus serbit prus de tres bortas s’àcua chi serbit a un’olivàriu italianu, duncas su sicori ddus at fertus prus chi in àterus logus. Ma sa produtzioni est calada puru in Itàlia, su segundu produtori mundiali (-27% in un’annu), comenti puru in Tunisia, Grètzia, Turchia e Portugallu. S’ollu ispanniolu, me is annus passaus faiat a dd’agatai me is stantis a cincu èurus a su litru e a bortas fintzas a tres èurus; in su mesi de austu passau unu litru de ollu ermanu costàt 10 èurus.
Ma poita sa calada spantosa de sa produtzioni ispanniola at fertu puru is prètzius de s’ollu italianu? S’arrexoni fait a dda spricai luegu: sceti su 24% de s’ollu ermanu prodùsiu de aziendas italianas benit de olias italianas, ca su 76% benit de olias stràngias, pruschetotu ispanniolas (segundu is datus Assitol chi pigant in consìderu s’ollu bèndiu me is butegas de is trumas cummercialis mannas). Po custa arrexoni Coldiretti est circhendi de favoressi acòrdius intra de is aziendas po ammanniai sa produtzioni natzionali. Sa tarea est cussa de lompi a prantai unu millioni de matas de olia in totu Itàlia po mori de is agiudus de su Pnnr.
Fintzas a pagus annus fait is produtoris italianus de ollu si chesciànt de is prètzius tropu bàscius, ma immoi chi s’ollu ermanu lompit a noi – dexi èurus a su litru no fait a festai. Su consumu natzionali de ollu ermanu me is primus dexi mesis de su 2023 est calau de su 9%, s’11% chi pigaus in consìderu puru s’ollu chi no est ermanu. In s’Unioni Europea sa situatzioni est peus puru ca sa Cummissioni europea at fatu sciri chi is consumus funt calaus de su 18%. Po Assitol, s’assòtziu de is produtoris de ollu alimentari, iat a tocai a fai cumprendi a is consumadoris chi s’ollu de olia, po is propriedadis e is valoris alimentaris chi tenit, ballit su prètziu chi costat.
Uniprol, s’assòtziu de is aziendas de olivàrius, at postu s’atentu apitzus de un’àtera cosa puru: sa crèscia, me is stantis, de amesturus de ollu de olia e àteru ollu alimentari. Custus produtus nous, chi costant pagu, iant a tocai averiguaus in contu de calidadi po prevenni is trampas alimentaris. Uniprol pedit chi me is ampullas de ollu ddoi siat scrita sa percentuali de ollu de olia chi ddoi at aìnturu de s’amesturu.
Massimiliano Meloni
