Est nàschidu in custas dies “Space9_MIdIS, Museu Immateriale de s’Immàgine” , su primu museu dedicadu a s’arte de sa fotografia in Sardigna, unu logu virtuale acasagiadu in su giassu www.space9.it.
Su progetu nde lompet dae un’ idea de Giovanni Follesa, giornalista e iscritore, dotzente a s’Acadèmia de Bellas Artes de Tàtari e Sonia Borsato, diretora de Su Palatu, tzentru culturale de sa fotografia sarda fundadu in Biddanoa Monteleone de Salvatore Ligios.
Chie intrat in su giassu, e movende dae un’aposentu a s’àteru, at a pòdere ammirare is espositziones de su mamentu e una Colletzione istabbile cuncordada cun prus de mille òberas de chimbanta autores, mescamente sardos.
“Totus paris custa òberas – ispiegant is fundadores de su museu – nde pesant unu fàbricu identitàriu capassu de lèghere sa cuntemporaneidade pro mèdiu de s’ogru de sa fotografia in Sardigna e chi, a intro de Space9, s’intregat a una cuscièntzia universale, aberende·si a s’allega cun su mundu, cun un’ atentu piessignu a totus is Paisos de su Mediterràneu”. Luego at a èssere disponìbile fintzas una butega pro cummertziare trastos chi pertocant su museu.
S’idea a nàrrere sa beridade est de su 2017 cando custa pandemia, chi est ponende in genugru su mundu, fiat atesu de is pensamentos de is promotores: difatis pensaiant de catalogare is fotògrafos de sa Sardigna e de ddos batire a s’internu de una dimensione digitale pro ddos pòdere fàghere connòschere e presentare a unu pùblicu prus ampru, barighende in manera digitale is làcanas de s’Ìsula.
Pro incingiare sa faina, ant aparitzadu sa mustra “Confini/Orizzonti – Meditazioni Mediterranee”. In sa mustra, seberadas de is curadores Borsato e Follesa, ddoe sunt òberas de sa colletzione de su museu, is iscatos de fotògrafos sitzilianos e unu traballu realizadu in Catalugna de Myriam Meloni e Arnau Bach. “Sa mustra – sutalìniant is duos curadores – naschet de sa voluntade de incarrerare una relata tra Sardigna, Sitzìlia e Bartzellona, cun sa responsabilidade de lèghere su Mediterràneu chi, pro natura sua, aunit e pratzit, donat e leat, contat e ponet su selèntziu”.
Manuela Ennas
