Cida passada s’ONU at fatu sciri chi in su mundu seus arribbaus a essi 8 milliardus. Est unu datu spantosu chi impensamentat puru.
In su 1950 in sa Terra ddoi fiant “sceti” 2,5 milliàrdus de abitantis, duncas in nimancu 70 annus sa populatzioni est crèscia prus de tres bortas e sèmpiri prus a lestru, ca me is ùrtimus 12 annus seus passaus de 7 a 8 milliàrdus. Is arrexonis de custa àndala funt de circai in s’allonghiamentu de sa vida po mori de is progressus in contu de sanidadi, alimentatzioni, igieni.
Po is Natzionis Unidas in su 2037 eus a arribbai a essi 9 milliàrdus, po lompi a 10,4 milliàrdus in su 2080. Unu nùmeru deaici mannu de genti fait pensai luegu una cosa sceti, est a nai chi in sa Terra no ddoi at a podi essi cosa de papai po totus. Giai immoi, segundu unu stùdiu de Coldiretti, in su mundu prus de una persona asuba de dexi (828 millionis) sunfrit sa fàmini. Casi 2,3 milliàrdus de personas, su 29,3%, no tenint seguresa alimentari e, a dolu mannu, giai 45 millionis de pipius asuta de cincu annus sunfrint de smarridura e indiritura 149 millionis tenint unu deficit de isvilupu poita no podint papai is cosas profetosas po s’edadi insoru. Is dificultadis alimentaris funt mannas meda pruschetotu me is Stadus prus pobèrus ma, mancai prus pagu, in cussus prus arricus puru, po nexi de sa apedèmia, de is gherras e de sa crisi energètica chi seus bivendi.
Ita at a acuntessi in su benidori no fait a ddu sciri cun seguresa, ca ddoi funt duas genias de ideas in contu de custa cosa. Po sa prima idea no eus a podi cresci sena de nisciunu lìmidi ca su lìmidi, chi ddu boleus o no, dd’at a ponni sa Terra etotu. Eus a arribbai a su puntu chi no ddoi ant ai prus resursas naturalis – terra, energia – po totus e sa populatzioni at a smiti de cresci. In custu scenàriu funt de tenni in contu degòllius comenti apedèmias, caristias, gherras. Sa segunda idea portat in una bia diferenti ca partit de su consìderu chi giai me is annus ‘70, candu fiaus sa metadi de oi, po is spertus comenti cussus de su Club de Roma, fiaus giai arribaus a su lìmidi chi sa Terra podiat babiai. Su chi est bènniu pustis perou at ammostau su contràriu. S’Àsia, chi insaras sunfriada sa fàmini, at connotu un’isvilupu mannu e su problema de s’alimentatzioni in cussus logus no est prus una cosa grai comenti prima. S’Ìndia, chi biviat caristias fitianas e depiat importai meda cosa de papai, at isvilupau sa laurera sua in manera deaici profetosa chi immoi produsit cantidadis mannas chi bendit a is Stadus stràngius puru.
Alessandro Meloni
