Chida passada in is locales de sa ex Vetreria de Pirri, su Crs4, Tzentru de chirca de su Parcu scientìficu e tecnològicu de sa Sardigna, in collaboratzione cun Athlos, azienda sarda ispetzializada in su chi pertocat s’intelligèntzia artifitziale e is relatas intra de òmine e màchina, at presentadu su primu robot antropomorfo, est a nàrrere assimigiante meda a s’òmine, chi at a traballare comente assistente in bilbioteca, sende capassu de intrare in relata cun is bisitadores, averiguare chi ddoe sunt is libros chi cherent e ddos acumpangiare a in ue sunt postos. A su robot dd’ant postu Rossana, de s’acrònimu de su sistema operativu Ros (Robot operating system).
Rossana est su resurtadu finale de su progetu “Robotika”, finantziadu de Sardegna Ricerche cun 300.000 èuros, cun s’idei de isvilupare unu protòtipu de robot fìsicu cunversatzionale. S’isperimentatzione, fata in su mentres de su segunda serrada pro curpa de s’apadèmia, dd’ant portada a in antis in is laboratòrios de su Crs4, cuncordados pro custa fase comente chi èsserent una biblioteca.
“Su robot cumprendet is preguntas chi ddi benint fatas e gràtzias a s’ausìliu de s’abistesa artifitziale isvilupada de Athlos donat is respustas – at contadu Giacomo Cao, amministradore ùnicu de su Tzentru de chirca – in prus est capassu de si mòvere a sa sola pro acumpangiare is bisitadores a ddis inditare in ue sunt assentados is libros chi ant pedidu, ma mescamente, gràtzias a su programma imbentadu de is tecnòlogos nostros, reconnoschet s’ambiente chi d’est a inghìriu, e donat atentu, pro nàrrere, a no andare a nche atapare in carchi cosa”.
“In custu progetu, at naradu imbetzes Alessandro Frulio, responsàbile tècnicu scientìficu de Athlos – s’azienda at traballau a unu sistema cunversatzionale avantzadu pro donare unu cherebddu a su robot, capassu de cumprèndere, chistionare, arregordare e imparare. In prus, gràtzias a una forma de memòria chi ddi permitet de reconnoschere is caras de is chi ddi fueddant, podet tènnere cun issos una relata chi nde tenet contu. Amus batidu su robot in un’ambiente comente su de is bibliotecas e dd’amus imparadu a èssere comente un’assistente bibliotecàriu chi donat ìnditos subra is libros e subra is scritores presentes e is àteros autores e volùmenes. Sa màchina – at sighiu Fruilio- est bona pro àteras isperimentatziones e faghet a dd’isvilupare de prus pro averiguare is relatas cun s’ambiente de foras, sende chi fintzas a immoe si podet mòvere in unu logu serradu”.
Massimo Deriu, tecnòlogu de su CRS4, in pare a is collegas Federico Bachis e Marco Massa, at contadu de comente ant isvilupadu su programma de controllu de Rossana chi ghiat totu is moviduras de is bratzos, de sa conca e de is rodas. Oro sa conca ant dèpiu progetare fintzas su sistema de interatzione, chi permitet a Rossana , comente fiamus narende prima, de reconnòschere is caras de is personas e ammostare is sentidos suos mudende su colore de sa cara.
Manuela Ennas
