Torrende a Immuni una nova de importu de su sèberu italianu est su remenu de su Ministeru pro s’innovatzione tecnològica e sa digitalitzazione a fàghere a manera chi su còdighe de s’aplicatzione siat open source, progetada po ddoe pòdere intrare a isprùbbicu e duncas cun sa possibilidade chi àteros guvernos dda potzant impreare contra su virus e chi dda potzat istudiare e megiorare chie si siat nde tèngiat gana. Custu remenu chi agatat cunfirma in s’ordinàntzia de su 16 de abrile pro s’incarrigu a Bending Spoons, in ue si faghet riferimentu a su fatu chi sa sotziedade est disponìbile a cuntzèdere sa lessèntzia de impreu aberta e a indonu a su Commisàriu de a sa Presidèntzia de su Consìgiu de is Ministros. Difatis dae su de su 25 maju subra GitHub (https://github.com/immuni-app) est a disponimentu su còdighe de Immuni, comente aiat promìtidu su Ministeru a pustis de unu tempus de proas.
Is espertos chi ant traballadu a s’isvilupu de Immuni, de acòrdiu cun su Ministeru de s’Innovatzione, ant detzìdidu de mudare su mollu de funtzionamentu, pro crèschere sa riservadesa, sa seguresa de is datos e andare in favore a is rechestas de Google-Apple (a non ddas satisfàghere diat àere postu a arriscu su funtzionamentu de s’app). Si portant a dae in antis is ideas de su progetu Decentralised Privacy-Preserving Proximity Tracing (DP-3T) chi si nche stesiadu dae su Pepp-Pt persighende unu mollu prus decentralizadu. Is novidades ddas ant a mustrare in is versiones imbenientes de s’app in antis de sa bessida finale.
Sa diferèntzia prus manna respetu a sa primu versione de Immuni e a Pepp-Pt est chi sa generatzione de is craes tzifradas (critografia) acontesset in deretura in is dispositivos de s’impitadore, imbetzes chi subra su server comente fiat a comintzu. Gasi, ogni borta chi duos tzellulares si “adòbiant”, naraus chi abarrant acanta pro unu tempus istabilidu segundu is paràmetros chi ant a dèpere definire is autoridades sanitàrias, s’iscàmbiant s’identificativu anònimu ingendradu cun critografia. Tando su tzellulare dotadu de app portat avatu feti una lista de nùmeros chena de cale si siat elementu identificativu de sa persona.
Su server s’at a limitare a intregare sa lista de is còdighes anònimos de is contagiados. Non ddoe at prus unu server chi cuntèngiat siat is còdighes de is tzellulares siat is craes tzifradas, smenguende aici sa possibilidade de re-identificare is sugetos. Comente apu giai naradu, no est solu una chistione de riservadesa ca s’adduida a Apple-Google podet reduire fintzas s’arriscu de lìmites in sa funtzionalidade.
Su problema prus mannu est chi is sistemas operativos mòbiles lìmitant is aplicatziones in background (chi cheret nàrrere totu cussas fainas chi unu dispositivu podet fàghere chena de firmare is àteros programmas abertos), e podent acabare in manera fortzada su protzessu e impedint chi un’app tèngiat su controllu de su mòdulu bluetooth. De cunsighèntzia non diat acontèssere su contact tracing. Su problema est fintzas prus grae cando a intrare in cuntatu sunt duos tzellulares de sistemas diferentes.
Sa tarea de is informaticos immoe est sa de risòlvere custas crititzidades in su funtzionamentu de sas app in background e s’arriscu de is “farsos negativos” dèpidos a su fatu chi su bluetooth non dd’iant mai impreadu aici ma sceti pro una relata intre de duos dispositivos. Pro su matessi motivu traballant pro reduire s’arriscu de “farsos positivos”. Isfrutende is istrumentos de programmatzione (API) chi Apple e Google ant postu a disponimnetu, is espertos podent regulare mègius s’algoritmu chi càlculat sa distàntzia intervenende in sa potèntzia de su signale bluetooth e in is tempos de espositzione. Sena de API non diant pòdere modificare custos paràmetros. Pro is aplicatziones comente Immuni, Apple e Google ant postu règulas de sighire. Difatis ant proibidu àteros impreos de is datos ammentados in is tzellulares e de pedire s’atzessu a su gps pro sa “geolocalitzazione”. In prus s’atzessu a is API at a èssere permìtidu a una app sceti pro paisu.
(sighit…)
Manuela Ennas
