Novas bellas in contu de limbas de minoria funt lòmpidas ariseru de sa Regione Sardigna. Difatis sunt de duos milliones de èuros is finantziamentos de sa Regione Sardigna pro s’amparu, s’avaloramentu e sa spainadura de is limbas de minoria. S’Assessore pro s’Istrutzione Pùblica e Benes Culturales, Andrea Biancareddu, pro cantu pertocat is finantziamentos pro su 2021, at fatu ischire chi sa Presidèntzia de su Consillu de is Ministros, Dipartimentu pro is Afàrios Regionales e is Autonomias, at de pagu detzìdidu de destinare a sa Sardigna unu finantziamentu de 998 milla èuros.
Sa Giunta at seberadu de annànghere àteru dinari a custu finantziamentu, imperende is risursas pro su 2021, pro s’amparu de is variedades alloglotas de su gadduresu, de su tataresu e de su tabarchinu, lompende duncas pro is annualidades 2021-2022 a una tzifra in totu de 2 milliones e 164 milla èuros pro s’amparu de is limbas de minoria.
“In is ùrtimos annos – at naradu s’Assessore Biancareddu – sa Regione at asseguradu sa presèntzia de is Isportellos Linguìsticos in logos meda de sa Sardigna, imperende dinari de is bandos de s’Istadu e is resursas postas a disponimentu cun is bandos regionales”. Duncas pro sighire in sa tarea de avalorare s’impreu de sa limba sarda in ogni setore de sa sotziedade e favorèssere semper de prus un’isparghidura in totu sa Sardigna, sa Regione at detzìdidu de finatziare tres lìnias de interventu. Sa primu pertocat progetos pro aberrere e sustènnere is atividades de is Isportellos Linguìsticos, pro sa formatzione linguìstica e pro progetos e fainas culturales pro mannos e pitzinnos, mescamente cuncordados de sòtzios de comunas cun asumancu 5000 abitantes, pro su sardu, po su catalanu de S’Alighera e is àteras variedades alloglotas, (tataresu, galluresu, tabarchinu).
In sa programmatzione de de is fundos ant a èssere pròpiu is atividades de is Isportellos Linguìsticos a tènnere prus importu e unu rolu pretzisu ca ddos ant pensados comente a unu “Front Office”, est a narrère ufìtzios de “cuntatu diretu” chi de immoe a dae in antis at a sighire de prus sa relata cun is impitadores, smenguende is fainas de bortadura de is documentos amministrativos/polìticos de s’Ente e ammanniende invècias sa collaboratzione cun s’Ufìtziu Relatziones Pùblicas de is Entes, cun s’Ufìtziu Protocollu, e su Servìtziu Cultura, Sotziale e de Assistimentu, seberende de donare prus importu finas a sa comunicatzione pro mèdiu de su web e de is retzas sotziales.
Su progetu cheret avalorare puru cussas atividaeis de animatzione culturale a manera chi siant capassas de arribare a sa gente e de pònnere in relata is generatziones pro unu cuncàmbiu de profetu. Sa Regione at a publicare un’ Avisu pùblicu pro intregare is resursas a disponimentu, tenende contu de su nùmeru de abitantes pro is progetos presentados. Una àtera lìnia pertocat su Catàlogu de is Laboratòrios culturales, chi est giai in faghimentu. S’Assessore at propostu chi bi potzant leare parte e fàghere rechesta totu is Entes, chena de tènnere in contu sa làcana de su nùmeru de is abitantes.
Sa de tres lìnias dd’at a gestire in deretura sa Diretzione Generale de is Benes Culturales, sende chi at a fàghere un’Avisu pùblicu pro aparitzare is cursos pro operadores de isportellu linguìsticu e operadores culturales in limba sarda.
Ca s’intendit meda su bisòngiu de formare operadores noos e ddos sunt pedende de tempus is Entes Locales chi otenent is fundos e is impresas e sòtzios chi donant su servìtziu de isportellu in su territòriu e chi a bortas no agatant personas ispetzializadas in custu setore.
Manuela Ennas
