Casteddu, Asuni e Sabarussa sunt is tres logos chi ant a acasagiare sa de trèighi editziones de su fèstival “Terre di confine”. Su programma dd’ant presentadu me is dies passadas in sa Cineteca sarda de Casteddu is dirigidoras artìsticas Antonella Puddu e Michela Anedda paris cun su presidente de s’assòtziu organizadore “Su Disterru” Sandro Sarai e is sìndigos de Asuni e Sabarussa, Gionata Petza e Mario Tendas. Su fèstival ddu cuncordant cun su patrotzìniu e su contributu de sa Regione Sardigna, de sa Fundatzione Sardigna Film Commission, de is comunas de Asuni e Sabarussa e de su Cunsòrtziu turìsticu “Sa Perda ‘E Iddocca”.
S’incingiadura est pro giòbia, su 24 de cabudanni in sa Cineteca sarda de Casteddu, cun sa projetzione de su vìdeu “De s’atra alas de s’arriu”, una faina realizada de Michela Anedda pro mèdiu de unu laboratòriu tzinematogràficu chi at interessadu is abitantes de Sabarussa e Asuni, cun s’agiudu de Antonella Puddu, chi at sighidu sa parte de is boghes. Su fèstival at a sighire su 25, 26 e 27 de cabudanni in s’anfiteatru de Asuni e in sa corte de su Mea (Museu de s’Emigratzione), pro si concruire su 2, 3 e 4 de santugaine a Sabarussa tra sa corte de Domo Sanna e Domo Naitana. Ocannu su fèstival est dedicadu a s’adòbiu tzinematogràficu e a is relatas tra sa Sardigna e is ìsulas Shetland, pro un’editzione chi tenet mescamente in consìderu is fèminas e su traballu insoru in su mundu de su tzìnema, de sa pastoria e de su disterru.
Tra is istràngios sa regista Anna Kauber cun su traballu suo “In questo mondo” chi at a introduire argumentos de atualidade comente a s’assolamentu, sa distàntzia e is migratziones pro mèdiu de pellìculas e episòdios de sèries tv chi testimòniant grados diferentes de stereòtipos e maneras de abarrare a tesu de custos temas. Una novidade de importu pro su fèstival est sa presèntzia de una sèrie tv a intro de sa programmatzione, cun sa projetzione de duas puntadas de sa sèrie de sa BBC “Shetland”, chi at tentu renessida manna in su Regnu Unidu. In is pellìculas propostas si faeddat sa limba de is territòrios: su sardu, s’inglesu, s’italianu e is limbas regionales de sa penìsula.
In calendàriu non podiat mancare “Assandira”, su traballu de Salvatore Mereu, cun protagonista Gavino Ledda, chi de pagu at leadu parte a su Fèstival de su Tzìnema de Venètzia. Gabriela Rosaleva at a presentare unu documentàriu dedicadu a Grazia Deledda giradu cun su sustennu de s’Universidade de Tàtari. Su regista Marco Antonio Pani at a presentare pro sa primu borta su documentàriu “Padenti”. Ancora letziones de tzìnema documentàriu, de anàlisi e crìtica tzinematogràfica a incuru de Giovanni Columbu, chi at a presentare puru su traballu suo “Surbiles” subra is figuras mitlògicas sardas. Pro cantu pertocat sa fotografia in su Mea de Asuni sa mustra “Le vene rosse di Ulassai” dedicada a Maria Lai e su vìdeu “Ruviu – Biancu – Nigheddu” a incuru de s’artista Chiara Mulas in collaboratzione cun su fotògrafu Enrico Lai.
Pro sa mùsica ddoe at a èssere su cuntzertu de Joe Perrino e su musicista jazz Riccardo Pittau chi at a sonare paris cun is Dark Shade, una truma istòrica de Asuni formada de Alessandro Puddu, Stefano Tetti e Tore Anedda. Pro nd’ischire de prus e gai puru pro aparaulare is postos, ca sunt pagos cunforma a is règulas anti-Covid19, faghet a sighire custu ligàmine https://tdcf.it/index.php/it/.
Manuela Ennas
