Faci a is eletzionis de cabudanni

Su 25 de cabudanni eus a votai pro eligi su Parlamentu nou. Is partidus in custas diis funt decidendi is programas e is assòtzius po apariciai is listas de is candidaus. Is scannus in Parlamentu ant a essi 600 in totu e no prus 945, a pustis de s’intrada in fortza de s’arreforma costitutzionali asuba de sa smenguadura de su nùmeru de is parlamentaris Duncas eus a eligi 400 deputaus (in antis fiant 630) e 200 senadoris (in antis fiant 315).

Sa lei eletorali in fortza, chi ddi narant “Rosatellum” de su nòmini de su senadori Ettore Rosato chi dd’iat proposta (lei n.165/2017) decretat unu sistema eletorali ammesturau, siat proportzionali, siat majoritàriu. Difatis 1/3 de is scannus de sa Càmera e de su Senatu dd’eus a eligi po mori de unu sistema majoritàriu, mentris is 2/3 chi abarrant ddus eus eligi po mori de unu sistema proportzionali. Otu deputaus e cuàturu senadoris ddus ant a eligi is eletoris chi bivint foras de s’Itàlia.

S’eligidura de sa Càmera

Po eligi sa parti de deputaus cun su sistema majoritàriu su territòriu est partziu in 148 zonas geogràficas (chi ddi narrant collègius) chi torrant a pari cun su nùmeru de is deputaus de eligi. In dònnia collègiu is partidus e is assòtzius ant a presentai unu candidau sceti. Ddoi at ai sceti unu turnu de votatzioni, duncas at a essi elìgiu su candidau chi pigat a su mancu unu votu in prus de is àterus. In Sardìnnia ddoi funt cuàturu collègius de assignai cun su sistema majoritàriu.

Is àterus 244 scannus ddus ant a assignai cun su sistema proportzionali. Su territòriu est partzidu in collègius: innoi dònnia partidu o assòtzius presentat una lista de candidaus e dd’at a tocai unu nùmeru de scannus in proportzioni a su nùmeru de votus chi at arregortu. Is eletoris no podint sceberai is nòminis de is candidaus, ca ddus eligint sighendi s’òrdini de is nòminis in is listas. Cun custu sistema, in Sardìnnia eus a eligi seti deputaus.

S’eligidura de su Senatu.

In su Senatu su sistema est su matessi de sa Càmera, mudant sceti su nùmeru e duncas sa cumpositzioni de is collègius.

Po eligi is Senadoris ddoi ant essi 74 collègius de assignai cun su sistema majoritàriu (in Sardìnnia ant a èssi duus) e 122 collègius de assignai cun su sistema proportzionali (in Sardìnnia tres).

Is percentualis de barrancu.

Siat in sa Càmera chi in su Senatu ddoi funt, po su chi pertocat sa parti de deputaus de eligi cun su sistema proportzionali, duas percentualis de barrancu. Funt percentualis mìnimas de votus chi a is fortzas polìticas ddis tocat a pigai, asinuncas no arricint nisciunu scannu. Sa percentuali de barrancu est su 3% po is partidus e su 10% po is assòtzius.

Massimiliano Meloni

Atividade realizada cun su contributu de sa Regione Sardigna – IMPRENTAS 2021-2022.
LR 22/2018, art. 22
Attività realizzata col contributo della Regione Sardegna – IMPRENTAS 2021-2022.
LR 22/2018, art. 22

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Total
10
Shares

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
10
Share