A dolu de mannu Fabio Aru at detzìdiu: sa carriera de tziclista sardu intra de is prus famaus est acanta de acabbai. Dd’at fatu sciri issu etotu in is diis passadas, prima de s’inghitzu de sa Vuelta de Spànnia, donendi sa nova chi s’at a arretirai de is garas de tziclista professionista. Duncas sa cursa spanniola, innui Aru currit cun sa truma Team Qhubeka NextHash, at a essi s’ùrtima gara po su biddaxidresu.
Su tziclista duncas lassat sa professioni, a pustis de ai bintu unu segundu postu a sa Vuelta Burgos, ma pruschetotu a pustis de una bella pariga de stajonis chi funt andadas mali e meda atesu de candu iat bintu sa Vuelta in su 2015, de candu fiat arribau segundu a su Giro de Itàlia in su matessi annu e su de cincu a su Tour de France de su 2017, de candu iat liau parti a is Olimpìadis de Rio de su 2016.
“Nc’iant a essi cosas meda de nai. Apu pensau meda innantis de cumprendi chi custa est sa detzisioni giusta de pigai e apu imparau a stimai ncora de prus custu sport. Sa Vuelta at a essi s’ùrtima gara mia comenti tziclista professionista. Immoi est arribau su mamentu de incingiai unu capìtulu nou in sa vida mia, impari cun sa famìlia mia. Immoi nci funt cosas prus de importu -at nau Aru- ma speru de essi stètiu capassu de ammostai is valoris berdaderus de su sport in custu tempus”. Aru difatis at torrau gràtzias a totu sa famìlia po dd’essi abarrada acanta sèmpiri, de candu, 16 annus fait, at inghitzau a curri a bitzicleta, a totu is cumpàngius e totu is chi ddd’ant agiudau in custa esperièntzia.
A pustis de is primus annus cun sa Pro is arresurtaus prus mannu Aru ddus at lòmpius cun s’Astana, truma sportiva Ìtalo-Kazaka famada meda innui su giòvunu biddaxidresu at tentu po cumpàngius is prus mannus de su tziclismu mundiali. Su passàgiu a s’Uae Emirates, chi pariat su prus de importu de sa carriera sua, invècias no aest aici profetosu. Sa carriera est acabbendi_dda cun sa Qhubeka Assos. Po is sardus est stètiu unu bisu a ddu podi biri in is garas prus de importu de su tziclismu mundiali.
Manuela Ennas
