Est lòmpia ariseru una nova de importu po totu sa Sardìnnia, est a nai sa nàscida de sa Fundatzioni Mont’e Prama chi at a gestiri su patrimòniu archeològicu de is stàtuas de is Gigantis.
Difatis su Ministru po sa cultura Dario Franceschini at firmau su documentu costitutivu de sa Fundatzioni Mont’e Prama paris cun su Presidenti de sa Regioni Autònoma de sa Sardìnnia, Christian Solinas, e cun su sìndigu de Crabas, Andrea Abis.
“Cun sa firma de oi nascit sa FundatzioniMont’e Prama – at acrarau Franceschini – un’istitutzioni noa chi at a gestiri su patrimòniu spantosu formau de is stàtuas de is Gigantis paris cun su parcu archeològicu de Tharros. Sa collaboratzioni profetosa intra de su Ministeru po sa cultura, sa Regioni Sardìnnia e su Comunu de Crabas at permìtiu de lompi a custu arresurtau de importu, chi si donat unu trastu fundamentali po sa valorizatzioni e s’amparu de una de is prus testimònias mannas de una civiltadi mediterrànea antiga. Is Gigantis arrapresentant una possibilidadi po sa Sardìnnia e po totu su paisu nostu e seu seguru chi ant a fai perdi su sentidu a su mundu intreu’’. Su Ministeru po sa cultura at fatu sciri chi at a cunferri a sa Fundatzioni totu su cumplessu de is culpiduras de Mont’e Prama; su fraigu realizadu cun sa tarea de ammanniai su Museu archeològicu de Crabas, cun unu finantziamentu de tres milliones de èurus in s’àmbitu de su programma de interventus contivigiaus in su Pranu stratègicu “Grandi Progetti Beni culturali” po is annus 2015 e 2016; s’àrea archeològica de Tharros, sa Turri de Santu Giuannu e s’Ipogeu de Santu Salvadori.
Intra de is obietivus chi sa Fundatzioni tenit in conca de cumintzu, ddoi at de seguru sa progetatzioni e s’aprontadura de unu pranu stratègicu de svilupu turìsticu-culturali; sa valorizatzioni, fintzas paesagìstica, de su ‘”Sistema de valorizatzioni integrada territoriali de su Sinis – Terra de Mont’e Prama”; s’afortigamentu de is servìtzius de oferri a su pùblicu, siat po cantu pertocat s’acasàgiu siat po favoressi sa connoscèntzia; unu stùdiu fungudu po apariciai unu pranu de atividadis programmadas po mantènniri in saludi is benis arrecius, in acòrdiu cun sa Subraintendèntzia Archeologia, Bellas Artis e Paesàgiu po sa tzitadi metropolitana de Casteddu e is provìntzias de Aristanis e Sud Sardìnnia; s’organizatzioni de fainas didàticas e formativas capassas de fai acostai su pùblicu a su patrimòniu stòricu e culturali; s’ideatzioni e sa realizatzioni de atividadis de circa, stùdiu, documentatzioni, informatzioni e annestru, e fintzas de progetus de comunicatzioni e promotzioni. Sa punna est a incarrerai una collaboratzioni sèmpiri prus fitiana cun Universidadis, Acadèmias e Tzentrus de circa e restàuru natzionalis e internatzionalis.
In sa Fundatzioni ddoi at unu presidente, nominau de su Ministeru po sa cultura in acòrdiu cun sa Regioni Sardìnnia, su Consillu de Amministratzioni, su Consillu de Indiritzu, su Comitau Scientìficu, s’Òrganu de revisioni. Su Cda de sa Fundatzioni ddu ghiat su giornalista Anthony Muroni e impari a issu ddoi funt Paolo Fresu, musicista, Patricia Olivo, segretària regionali de su Ministeru de sa Cultura po sa Sardìnnia, Andrea Abis, sìndigu de Crabas, e duus rapresentantis de sa Regioni Sardìnnia: Efisio Trincas, dotori e ex sìndigu de Crabas e Graziella Pinna, docenti. Su se is Gigantis est unu scussòrgiu chi abetàt de meda un’arreconnoscimentu mannu. Incapas, cun is traballus e s’incuru de sa Fundatzioni, custa at a essi sa borta bona chi is gherreris s’ant a torrai a ponni in màrcia in is carreras de sa cultura, cara a unu mundu chi ddus scìpiat apretziai.
Manuela Ennas
