Su 27 de argiolas passau ant incingiau su Registru Pùblicu de is Opositzionis contras a sa publicidadi telefònica. Custu trastu, nàsciu po amparai is citadinus contras a su telemarketing, est a nai is propostas de bendida fatas a su telèfonu, a nai sa beridadi esistiat giai, ma cun su DPR n. 26/22 dd’ant melliorau e fatu prus simpli. Difatis in antis su registru arregolliat sceti is nùmerus de is telèfonus fissus immoi pertocat fintzas is nùmerus de is telefoneddus e is indirìtzus postalis acapiaus a is nùmerus de telèfonu.
Is aziendas chi faint telemarketing no ant a podi tzerriai is nùmerus scritus si no tenint su permissu de su proprietàriu.
Po chi no arrespetat sa norma ddoi funt penas, decretadas de su Còdixi in contu de amparu de is datus personalis e de su Regulamentu generali asuba de s’amparu de is datus (RGPD) . Is penas funt contraventzionis chi arribant fintzas a 20 millionis de èuros o, po is impresas, fintzas a su 4% de su guadàngiu totali de s’annu in antis.
Su servìtziu est pùblicu, a indonu e abertu a totu is citadinus, e fait a ddoi scriri is nùmerus de telèfonu in tres maneras diferentis: cumpilendi su mòdulu postu a disponimentu in su giassu http://www.registrodelleopposizioni.it/, telefonendi a is nùmerus birdis 800 957 766 (po is telèfonus fissus) e a su 06 42986411 (po is telefoneddus) o intreghendi cun sa posta eletrònica una dimanda a s’indiritzu iscritzione@registrodelleopposizioni.it.
Fait a arrocai is telefonadas de totu is aziendas opuru sceberai is aziendas de no arrocai. S’iscritzioni fait a dd’annuddai candu si siat e pertocat siat is telefonadas fatas de personas siat cussas automàticas (“robocall”).
S’iscritzioni annuddat totu is permissus a su telemareketing giai donaus. No fait a annuddai is permissus donaus a is aziendas de is bulletas (po esèmpiu cussas de su telèfonu o de s’eletricidadi) chi pertocant cuntratus in fortza o acabbaus de no prus de 30 diis.
Massimiliano Meloni
