Chini est chi no s’est mai tirau una fotografia a solu, de is chi immoi seus acostumaus a ddis nai selfie? Unu tempus ddis naramus autoscatus e incapitàt pagu de nudda de ndi fai, si no po calchi arrexoni pretzisa. Oi invècias a si tirai una fotografia a solus est una pratiga comuna, podeus nai una moda. Bastat a intrai in calisisiat retza sotziali po biri comenti is fotografias personalis siant meda de prus cunfronta a is de logus, de monumentus, de amigus o de parentis.
Ma poita a si fai totus custus selfie est divènniu aici de importu? E candu est chi podint arrapresentai unu problema? Provaus a cumprendi calincuna cosa in prus, circhendi de analizai su fenòmenu e de cumprendi, candu, a su chi narat sa scièntzia, tocat a ddi parai fronti. Segundu is spertus is selfie funt unu problema sotziali, fillu de is tempus nostus e de sa sotziedadi innui no podeus fai de mancu de si ponni in birdera. Unu stùdiu de setori at fintzas stabiliu tres gradus po custu problema chi andant de su prus pagu grai a su prus perigulosu po chi ndi sufrit.
Su stùdiu in chistioni dd’ant fatu a livellu universitàriu in Ìndia, cun sa Nottingham Trent University e sa Thiagarajar School of Management, analizendi e averiguendi sa bellesa de 400 partetzipantis indianus. Su scèberu de s’Ìndia po custu stùdiu no est stètiu casuali. S’Ìndia difatis est su Paisu chi contat prus impitadoris arregistraus in sa retza sotziali Facebook e nùmerus artus de mortis acontèssias a pustis de sa tenta de si tirai unu selfie in logus perigulosus.
Su chi est bessiu a pillu de su stùdiu e de sa circa est chi funt asumancu tres is livellus de sa “selfite” chi tocant cunsideraus perigulosus po sa saludi mentali:
1)Borderline: Candu una persona si tirat fotografias de sei asumancu tres bortas a sa dì ma chena de ddas pubricai in is retzas sotzialis;
2)Agudu: Candu una persona si tirat fotografias de sei asumancu tres bortas a sa dì e ddas cumpartzit totus in is retzas sotzialis;
3)Crònicu: Candu una persona si tirat fotografias de sei a totu dì e ndi pùbricat prus de ses in is retzas sotzialis.
Ma ita cosa est chi ingendrat me is personas custu spèddiu de si tirai fotografias de sighida? Is studiosus ant agatau e scerau ses arrexonis principalis chi funt:
-Sa tenta de fai ammanniai e afortiai sa stima de sei;
-Sa spera de melliorai sa spètzia;
-Sa gana de s’intèndi alligongiaus cun is àterus;
Sa circa de atentu de is àterus;
-S’abbisòngiu de allogai arregordus;
-Su sentidu de disputa chi spingit a ammostai de essi mellus de is àterus.
Cantu prus ndi ddoi at de custas arrexonis, tanti prus fait a cunsiderai grai su problema. Ma pruschetotu cantu est grai a ndi sunfriri? Po immoi su mundu scientìficu est partziu intra de chi pensat sa selfite comenti a unu storbu psicològicu e chi invècias ddu ponit, in manera prus simpli, intra de is abbisòngius. Tocat a nai perou chi spissu sa làcana intra de is duas cosas est giai giai nudda e de seguru is duus parris ant abarrai pagu a lompi a una detzisioni de acòrdiu.
De seguru su chi fintzas a immoi est craru est chi s’abbisòngiu de ammostai de sgighida is fotografias de sei cuat una forma de nartzisismu de partèntzia chi perou crescit impari a discumbènius acapiaus a un’impreu sballiau de is retzas sotzialis. Intra de custu podeus arremonai s’abbisòngiu de ammostai a su munudu de tenni una vida nodida mancai sa prus de is bortas no siat aici, s’abbisòngiu de arriciri cumplimentus gràtzias a unu selfie de primori chi perou no narat sa beridadi e su de fai sciri a totus ita seus faendi in dònnia mamentu de sa dì e de sa noti.
Su gradu de gravidadi de custus abbisòngius est acapiau puru a su tempus chi impitaus po is selfie aìnturu de sa dì e a su gradu de pensamentu, de matana chi intendeus candu invècias no ndi faeus. Su chi si depeus arregordai duncas est chi in prus de essi cunsiderau unu problema, a si tirai fotografias de custa genia podit essi s’anticàmera de unus cantus storbus psicològicus, fintzas de orìgini diferenti.
Manuela Ennas
