Echilìbriu. In Santu ‘Èngiu su primu murale pustis de su Coronavirus

Santu ‘Èngiu fintzas a una pariga de annus fait fiat una bidda connota pruschetotu po su cultivu de su tzafaranu e po sa funderia e mancai alloghit ancora oi in sa cresiedda de Santu Baìngiu martiri sa faci in pedra de sa giuighissa Lianora de Arbarèe no est stètia mai famada po su chi pertocat s’arti. Invècias de pagu tempus su nòmini suu est liendi unu sentidu nou po mori de una forma de arti apretziada meda in Sardìnnia e in totu su mundu chi est su muralismu, est a nai una manera de pintai is murus cun una tarea pretzisa. Gràtzias a s’imbentu de un’assòtziu culturali, chi ddi narant “Non solo Murales di San Gavino Monreale Paese di Artisti” ( sighei nnoi po ndi sciri de prus https://www.facebook.com/sangavinomonreale), nàsciu in su 2014 po arregordai a Skizzo, unu piciocu de bidda mortu giòvanu po nexi de su mali malu, Santu ‘Èngiu est punnendi aici a ndi bessiri de annus de mudori e de crisi econòmica e a torrai a essi unu logu biatzu e de spera po su benidori.

Est deaici chi, cun sa ghia de Giorgio Casu, artista famau oramai in totu su mundu po is murales cosa sua, est cumentzada s’abbentura de custa truma de amigus chi in pagu tempus ant mudau sa bisura de sa bidda pintendi fintzas a immoi sa bellesa de 64 murales cun s’agiudu de artistas sardus e internatzionalis chi ant cumprèndiu s’importu de custa faina ponendi Santu ‘Èngiu intra de is logus prus nodius po custa arti e faendi cresci me is annus is vìsitas de is stràngius. Aici a pustis de custu tempus de serrada po su Coronavirus, po torrai a incarrerai is atividadis, chi funt sèmpiri a càrrigu insoru e de chi tenit prexeri de ddus agiudai, s’assòtziu at cumbiadau a Millo, un’artista famau de su muralismu e, tempus de una cidixedda de traballu, su 9 de argiolas ant incingiau unu murale nou diaderus spantosu. Francesco Camillo Giorgino, in arti Millo (sighei custu ligàmini po ddu connosci mellus https://www.millo.biz/ ) est originàriu de sa provìntzia de Brindisi e immoi bivit in Pescara; est un’artista stimau meda in Itàlia e in su mundu, ca at fatu murales in logus medas (po ndi nai calincunu Parigi, Londra, Lussemburgo e Rio de Janeiro) e at bintu fintzas prèmius de importu comenti sa B.Art competition in su 2014 chi dd’at donau sa possibilidadi de pintai 13 murus in sa tzitadi de Torino. Su stili suu s’espressat po mori de simpreu de su biancu e de su nieddu cun unu deìscia de elementus architetònicus innui su colori serbit po ndi fai bessit a pillu unu pensu prus fungudu e fai nasci unu meledu. Su murale de Santu ‘Èngiu, chi s’agatat in bia Pàscoli, sa chi a primu ddi narànt bia de Murriali o de Santa Mariàcuas, est unu cumbidu a circai torra s’echilìbriu a pustis de s’emergèntzia de su Covid-19, e contat de s’abbisòngiu chi intendeus de torrai a sa vida chi teniaus prima, e si ponit in relata cun is trastos de dònnia dì ma fintzas cun sa stòria nostra ca, pròpiu in su tzentru, ddoi est pintada sa faci de unu de is Gigantis de Monti de Prama. Sa bidda aici sighit a ammanniai e avalorai su chi totus oramai cunsìderant unu museu a celu abertu e abetendi de cuncordai un’àtera faina tzèlebrat in sa mellus manera su gana e su sentidu de una comunidadi chi tenit ancora cosa meda de contai.

Manuela Ennas

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
0
Share