Duus giòvanus sardus funt Alfieris de sa Repùblica

Su Presidenti de sa Repùblica italiana Sergio Mattarella at cunferiu 30 atestaus de onori cun su tìtulu de “Alfieri de sa Repùblica” a giòvanus chi in su 2021 si funt fatus apretziai po s’impreu cuscientziosu e virtuosu de is trastus tecnològicus e de is retzas sotzialis, fintzas in relata a is problemas chi at portau de s’apedèmia.

Intra de is trinta giòvanus premiaus cun su tìtulu de Alfieri de sa Repùblica de su presidenti Mattarella nci funt fintzas duus giòvanus sardus, chi, po mori de is fainas tecnològicas, funt stètius de agiudu a àterus in su perìodu de dificurtadis mannas chi su Coronavirus at ingendrau.

Is sardus premiaus funt Alessio Cozzolino, unu piciocu de 19 annus de Terraba e Aya Jedidi, una piciochedda de 11 annus chi istat in Maracalagonis.

A Alessio Cozzolino dd’ant donau s’arreconnoscimentu po s’aficu suu e sa cumpetèntzia in contu de ambienti e de giustìtzia sotziali. De candu teniat 14 annus scriit po giornalis localis, italianus e internatzionalis, pruschetotu in contu de ecologia e de is malis chi est patendi sa terra. In su tempus de s’apedèmia at studiau in manera prus funguda sa chi naraus “transitzioni ecològica”donendi vida a unu giassu internet po arrexonai de custus argumentus e cumpartziri cun àterus studiantis is arresurtaus de is circas.

Aya invècias at arriciu su tìtulu de Alfieri de sa Repùblica po ai agiudau una cumpàngia sua de scola chi benit de su Marocco a cumprendi sa lìngua italiana permitendi-ddi de intrai prus in cunfiantza cun is àterus cumpàngius e cun is maistus. Aya difatis est de orìgini marochina e fueddendi s’àrabu in prus de s’italianu, pròpiu comenti unu mediadori linguìsticu, est arrennèscia a agiudai sa cumpàngia bortendi-ddi in àrabu is letzionis fatas in su mentris de sa didàtica a distàntzia o in presèntzia, sèmpiri cun amigàntzia e disponibilidadi. Custus piciocus ant ammostau un’incuru e unu bonucoru chi si donant ancora spera po unu benidori mellus.

Manuela Ennas

Atividade realizada cun su contributu de sa Regione Sardigna – IMPRENTAS 2020-2021.
LR 22/2018, art. 22
Attività realizzata col contributo della Regione Sardegna – IMPRENTAS 2020-2021.
LR 22/2018, art. 22

Total
1
Shares

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
1
Share