Custu acabbu de cida, est a nai su 17 e su 18 de mesi de ladàmini, e s’acabbu de cida chi intrat, su 24 e su 25, torrant in Sardìnnia puru is Diis Fai po avalorai su patrimòniu locali e is benis naturalis, culturalis e artìsticus.
Is Diis Fai de Atòngiu funt una manifestatzioni stòrica, cuncordada de su Fondo per l’Ambiente Italiano, fundatzioni nàscia in su 1975 cun sa tarea de amparai is bellesas de s’Itàlia. Is Diis cannu ddas ant dedicadas a sa fundadora Giulia Maria Crespi chi est morta in su mesi de argiolas passau, e ant a essi, comenti sèmpiri, un’ocasioni ùnica po scoberri logus de sa cultura pagu connotus e chi po su prus funt serraus a su pùbricu.
In totu Itàlia funt prus de 1000 is logus chi at a fai a visitai po mori de s’impènniu e de s’incuru de is legatzionis e de is voluntàrius de su FAI chi ant a acumpangiai is bisitadoris a sa scoberta de custas prendas cuadas.
In Sardìnnia, giai me is annus passaus, gràtzias a is Diis FAI, at fatu a scoberri e apretziai logus nodius: àreas archeològicas, crèsias, fàbricas chi testimòngiant sa richesa e sa variedadi de is benis culturalis chi nci funt in s’Ìsula nostra. Ocannu funt otu is logus chi liant parti a sa manifestatzioni: Casteddu, Assèmini, Nùgoro, Arbatassa, Arborea, S’Ulumedu, Tèmpiu e Lu Palau. Po sa primu borta in Sardìnnia su Fai at detzìdiu de incluiri sa “street art” in s’oferta sua, po fai connosci su mundu de custa forma artìstica chi s’espressat in is logus pùbricus e in sa dimensioie urbana, sceberendi sa “Galleria del Sale” est a nai unu tretu innui fait a andai a pei o a bicicreta de Su siccu a su parcu naturali de Is Molentargius. In sa bidda de Lu Palau s’at a podi visitai sa Bateria militari Talmone, una testimoniantza de importu de sa stòria militari italiana. Sa Bateria militari fait parti de unu sistema de giai 50 edifìtzius militaris, pesaus in sa segunda metadi de su ‘700, chi at tentu unu rolu de importu in sa difensa de is làcanas natzionalis a s’incràs de s’Unidadi de s’Itàlia.
In Casteddu s’at a podi visitai s’ispidali militari in su cumplessu de su novitziau de is Gesuidas de Santu Micheli in Stampaxi. Po totu is àterus logus e po is oràrius est mellus a averiguai in su giassu internet de su Fai sighendi custu ligàmini https://www.fondoambiente.it/. Si podit fai s’aparaguladura puru, sendi chi is intradas funt contadas po arrispetai is normas anti-Covid.
Manuela Ennas
