Su 23 de abrile est sa Die mundiale de su libru e de is deretos de autore e nos donat s’oportunidade pro fàghere unu meledu subra de is abitùdines de letura de is istudiantes e subra is trastos, de paperi e digitales, chi impreant mescamente.
Est in su 1995 chi sa Cunferèntzia Generale de s’Unesco at seberadu custa data simbòlica pro sa literadura universale, ca est su 23 abrile de su 1616 chi sunt mortos scritores de gabale comente a Cervantes, Shakespeare e Garcilaso de la Vega. Su matessi die signat fintzas sa nàschida o sa morte de àteros iscritores de importu comente a Maurice Druon, Halldór Laxness, Vladimir Nabokov, Manuel Mejía Vallejo, Élisabeth de Gramont, Maria Majocchi, Josep Pla,Renata Viganò, P. L. Travers.
Custa tzelebratzione tenet is orìgines suas in Ispagna e prus de pretzisu in Catalugna. Su promovidore de custa faina est istadu s’iscritore Vincent Clavel Andrés. In ie, giai de su 1926 cando su re Alfonso su de trèighi dd’at istituida cun unu decretu reale, in custa die sighint una traditzione de su Mesu Evu de ofèrrere una rosa a is fèminas e fintzas pro s’achistu de unu libru.
No est difìtzile a cumprèndere chi sa renessida de custa die lompet pruschetotu de s’interessu e de su consideru chi ddi podent dare is amantiosos e is traballadores de custu setore comente a autores, imprentadores, librajos, educadores e bibliotecàrios, istitutziones pùblicas e privadas, organizatziones non guvernativas e fintzas, craru, is mèdios de comunicatzione. Custos ùrtimos leant parte in ogni Paisu pro contu de is Cummissiones Natzionales pro s’Unesco, assòtzios, tzentros e tzìrculos de s’Unesco, retzas de iscolas e bibliotecas assotziadas e volontàrios chi cherent fàghere parte de custa tzelebratzione a in totu su mundu.
Custa die dd’ant cuncordada pro favorèssere is libros e is autores a manera chi cantas prus persones si potzant acostare a sa letura ca is libros rapresentant su prus bellu imbentu pro cumpartzire ideas su trastu prus balente pro gherrare sa poberesa e fraigare unu mundu mègius. A fàghere unu càrculu in su 2020 is letores sunt calados de unu pagu. A lèghere de prus abarrant is fèminas chi mustrant de prefèrrere is libros in paperi contras a is òmines chi seberant is libros digitales. Is libros de ascurtare imbetzes ddu seberant de prus is giòvanos e fintzas is pipios.
Manuela Ennas
