Die Mundiale de s’Epatite. Un’àteru primatu tristu pro sa Sardigna

Su 28 de trìulas totu su mundu tzèlebrat sa Die Mundiale de s’Epatite. Un’eventu promòvidu dae s’Organizatzione Mundiale de sa Sanidade chi in ocasione de s’Assemblea Generale de su 2010 at detzìdiu cun unu pregone de dedicare custa Die a s’informatzione e a su prevenimentu de is epatites. Su seberu de sa data est in onore a Baruch Samuel Blumberg, dotore nàschidu su 28 de trìulas de su 1928 e onoradu, in su 1976, de su prèmiu Nobel pro sa meighina e sa fisiologia pro is iscobertas chi pertocant su virus de s’epatite B e is traballos pro s’isvilupu de su primu vacinu.Sa tarea est sa de lòmpere a s’opinione pùblica e is istitutziones ponende in evidèntzia s’importu e su bisòngiu de parare fronte a custu apretu chi, annu pro annu, est andende de male in peus.

S’Organizatzione Mundiale de sa Sanidade e sa World Hepatitis Alliance, organizatzione internatzionale non profit chi collit unu nùmeru mannu de assòtzios e istitutziones pro dare boghe a chi sufrit de epatite, promovent una sèrie de propostas, in totu su mundu, cuncordadas pro informare subra is genias de epatites chi esistint, subra is maneras de dda leare, subra is arriscos e is mètodos de prevenimentu e is curas, sendi ca a dispetu de is nùmeros chi lompet s’epidèmia de epatites, a custa maladia dda connoschet ancora pagu gente. Duncas tocat propònnere is strategias de interventu comunos a livellu internatzionale e megiorare totu is informatziones chi dda pertocant. Su tema chi s’Organizatzione at seberadu pro ocannu est “Agata is milliones chi mancant” cun s’idea de fàghere essire a pìgiu totus cussas personas chi no ischint de sufrire de custa maladia, pro garantire curas, non pèrdere àteras vidas e firmare s’impestu.

Pròpiu in custa die s’Eurostat at fatu ischire chi s’Itàlia cunfirmat su primatu europeu pro mortos de epatite virale. In base a is datos de su 2017 diat èssere istadu de 5.500 su nùmeru totale de mortes in s’Unione europea pro epatite e su tassu de mortalidade prus artu dd’agatamus in Itàlia e su prus bàsciu in Finlàndia. Pro stilare unu cunfrontu tra is Paisos, su nùmeru assolutu de mortes in is Istados – comente narat s’Eurostat – depet èssere adeguadu a is dimensiones e a s’istrutura de sa populatzione. Cun 33 mortos pro epatite virale pro millione de abitantes, s’Itàlia at registradu su tassu prus artu tra is Istados de s’Ue in su 2017. A s’Itàlia dda sighit sa Letònia (31 mortos pro millione de abitantes) e s’Àustria (19). Is tassos prus bàscios ddos ant registrados in Finlàndia (cun prus pagu de 1 mortu pro epatite pro millione de abitantes), in Islovènia (1) e Paisos Bàscios (2). Pro cantu pertocat is datos regionales, sa Sardigna cun 53 mortos pro epatite virale pro millione de abitantes est sa regione prus ferta in s’Ue in su 2017, sighida de àteras regiones italianas: sa Pùglia (51 mortos pro millione de abitantes), sa Basilicata e sa Campània (ambas cun 49 mortos), sa Calàbria (42) e sa Sitzìlia (40).

Manuela Ennas

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
0
Share