Didàtica a distàntzia: ruolu de s’iscola in sa sostenibilidade digitale

Torrende a s’innovatzione in su mundu de s’iscola, una tarea de lòmpere est sa de propassare totu is diferèntzias chi custa crisi est faghende essire a pìgiu. Non totus possedint is trastos adeguados. Pro nàrrere nois semus tra is pòpulos cun sa percentuale prus arta de smartphone a su mundu, ma famìlias medas non tenent unu elaboradore portatile o fissu e mancu una lìnia fissa pro intrare in internet. Non semper faghet a sighire sa didàtica in lìnia cun unu tzellulare, fintzas s’impreu de is smartphone prus reghentes non permitent un’iscàmbiu adeguadu e de continu. Sa chistione tocat dae acanta dotzentes medas puru. Difatis in Itàlia, segundu su Desi – s’ìndice de digitalitzazione de s’economia e de sa sotziedade- semus in dae segus siat in s’impreu de sa lìnia lestra chi in s’impreu de is istrumentos tecnològicos. E duncas, est de importu ancora una borta un’isfortzu colletivu, in antis de totu pro mèdiu de intzìdios.

Un’àteru argumentu de tènnere in consìderu est su chi pertocat is cumpetèntzias (de is dotzentes e de is dischentes) e de s’acostamentu a s’imparonzu. Si est beru chi pro is prataformas tecnològicas ddoe at sèberu, ca totu is aziendas chi nde cuncordant si sunt postas a disponimentu de su Miur, pro is materiales semus agoa, ca is domos imprentadoras sunt ancora traditzionales, e duncas iscolas e dotzentes s’agatant a imbentare a solos materiales e mètodos pro imparare disciplinas clàssicas cun trastos tecnològicos noos. Ma, nointames custos isfortzos de imbentu, pro su prus nche si lìmitat a impreare is tecnologias comente a suportu de una didàtica àncora traditzionale meda, in ue a bìnchere est sa letzione frontale. Podimus nàrrere de èssere sceti a su primu istàdiu de innovatzione nche ancora cosa medade fàghere pro avalorare is oportunidades postas a disponimentu de custos trastos.

In custu cuntestu de giambamentu mannu, su cuadru de riferimentu normativu no est cosa de làssare a pèrdere. Pensemus sceti a totu is dudas chi ancora nche sunt in tema de avaloramentu e de acumprimentu de is esàmenes e prus in generale de sa congruida de s’annu iscolàsticu e de s’inghitzu pro s’annu imbeniente. E su meledu pertocat puru sa seguresa de is datos personales, mescamente cando faeddamus de minores. Torrende a su tema de s’inclusione, giai in su Dpcm de su 8 martzu 2020 amus lèghidu chi bisòngiat prestare un’atentu piessignu a is bisòngios ispetzìficos de is istudiantes chi tenent formas de disabilidade e su Miur at ativadu luego “S’inclusione pro mèdiu de su web”, unu canale temàticu nou de suportu a is insegnantes in is percursos de didàtica in lìnia pro is dischentes cun isentùmine. Ma s’argumentu est delicadu a beru. S’iscola italiana est de primore pro is polìticas suas de inclusione e pro custa cajone est una de is prus pretziadas in su mundu.

Sa didàtica a distàntzia imbetzes ammànniat is diversidades. Si castiamus a su tema de s’isentùmine, su bantu nostru comente a paisu est s’inclusione a intro de sa classe, in ue si punnat a favorèssere una didàtica colletiva e su traballu in truma, mentras s’assolamentu obrigadu dae s’emergèntzia sanitària est un’elementu in prus de esclusione. Una dificurtade manna chi bisòngiat de un’atentzione abista de professionistas de su setore. In Itàlia tenimus duncas cumpetèntzias pro afrontare custa situatzione e nche sunt progetos giai bene incarrerados chi diat a tocare a pònnere in evidèntzia, comente a s’atividade de consulèntzia chi faghent is CTS (Tzentros Territoriales de suportu). Duncas s’apretu de custas dies at dimustradu chi faghet a mudare. Ma sceti cando si tocat ca semus obrigados a ddu fàghere? Diat tocare invècias a fàghere recursu a sa tecnologia digitale pro torrare a pensare sa didàtica in unu cuadru de sostenibilidade, est a nàrrere torrare a ingendrare is mollos didàticos pro ddos adatare a custu cuntestu nou.

Pro ddu fàghere is tecnologias sunt alleadas netzessàrias, ma ddas depimus castiare a intro de unu cuadru prus mannu, su de sa sostenibilidade digitale. E custu balet in custu mamentu, ma balet tantu prus cantu si bògiat cunsiderare custu mamentu comente a una fase de mudada chi est destinada a lassare arrastos in unu mundu chi at a èssere de seguru diferente dae comente fiat in antis dae su Coronavirus. Insaras nde benit dae sese chi su ruolu de s’iscola, pruschetotu immoe , podet èssere de fundòriu pro is àteros setores de sa sotziedade, sende chi podet dare a is istudiantes e a is tzitadinos de cras trastos adatos a impreare in manera cabosa e cun capia servìtzios e prataformas ùtiles, ma cun mecanismos chi tocant connotos bene pro non ddos dèpere patire.

Manuela Ennas

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
0
Share