A pustis de tre cidas a colori arrùbiu sa Sardìnnia torrat de oi, su 3 de maju, a colori de aràngiu. Torraus a biri calis funt in racumandatzionis, inditadas de su Guvernu, chi tocat a sighiri. Po su chi pertocat is trantziduras e bessidas,si in zona arrùbia no fiat permìtiu a bessiri de domu si no po arrexonis de netzessidadi, traballu o saludi, in zona a colori de aràngiu fait a trastillai liberamenti aìnturu de su territòriu comunali. Is bessidas no abbisòngiant de arrexonis e duncas s’autocertificatzioni no serbit prus. Invècias est vietau a bessiri a foras de su comunu innui biveus, si no est po arrexonis de traballu, saludi, e netzessidadi. Puru chi bivit in una bidda cun prus pagu de 5.000 abitantis podit bessiri in unu raju de 30 chilòmetrus, ma no podit andai a is biddamannas de provìntzia. Po nai, a mari duncas ant a podi andai sceti is chi su mari ddu tenint in su comunu innui bivint, o si est in su raju de cussus 30 chilòmetrus ddoi podint andai is chi bivint in una bidda cun prus pagu de 5000 abitantis. Podint andai puru is chi tenint sa “certificatzioni birdi”. Difatis sa certificatzioni birdi donat sa possibilidadi de si movi, aìnturu de totu sa regioni e fintzas foras. Po dd’otenni serbit unu tamponi chi arresurtit negativu fatu in is ùrtimas 48 oras, o unu documentu chi assegurit de essi sanaus de su Covid in is ùrtimus ses mesis o unu documnetu cun is datus de sa vacinatzioni po su SarsCov2.
Po su chi pertocat is segundas domus est permìtiu a ddoi lompi in totu su territòriu natzionali, ma ammostendi de ai tentu su permissu prima de su 14 gennàrgiu de su 2021. Perou po custa chistioni tocat a nai chi su presidenti de sa Regione Sardìnnia, Christian Solinas, at prorogau duas ordinàntzias: sa primu allònghiat de duas cidas is averiguamentus cun proas lestras po chini arribat in Sardìnnia e sa segunda, allonghiada po àteras 14 diis, no lassat intrai is meris de is segundas domus chi no funt residentis in s’Ìsula, si no po is arrexonis chi connosceus giai e ammostendi su documentu de vacinatzioni o de tamponi negativu. Po su chi pertocat is bìsitas, est permìtiu a andai a agatai sa famìlia e is amigus, sceti aìnturu de sa matessi bidda. In is domus privadas fait a acasagiai no prus de 4 personas chi no faint parti de su nùcleu familiari. A custus cuàturu fait a aciungi is fillus fintzas a 14 annus e is personas chi no funt autosuficientis.
Donnia faina e duncas is bìsitas puru tocant fatas innantis de s’ora de sa ritirada, est a nai a is dexi de merì. Po cantu pertocat sa scola funt abertus is asilus po is pipius prus piticus, is scolas de sa pipiesa, sa scola primària e segundària de primu gradu in presèntzia. Po sa segundària de segundu gradu tocat assegurada, segundu is ìnditus de s’ùrtimu decretu firmau de su Presidenti de su Consillu de is ministrus Mario Draghi, sa presèntzia asumancu po su 70% e fintzas a unu màssimu de su 100%. Po su sport fait a curri e a pratigai atividadi motòria. Currendi o andendi in bitzicleta fait fintzas aintrai o passai in un’àtera bidda ma sceti si sa cosa serbit a sa faina sportiva in chistioni. In prus s’acabbu de sa faina depit coincidi, e duncas essi su matessi, cun su logu de partèntzia, ca aici ddoi est scritu in su decretu.
Abarrat vietau dònnia arratza de sport a livellu amatoriali innui is atletas si podint tocai e atumbai. Piscinas e palestras puru sighint a abarrai serradas. Aici puru is tzìnemas, is museus e is teatrus abarrant serraus fintzas a candu no eus a torrai asumancu in zona groga po torrai a ddus aberri e gosai aici de spetàculus, mùsica e atòbius culturalis. Is tzilleris e is locandas puru abarrant serraus a su pùblicu, ma podint traballai, a is oràrius inditaus, sceti bendendi su mandiari o portendi-ddu a domu de is clientis. Torrant a aberri butegas, parruchieris e estetistas. No fait ancora a s’atobiai po riunionis privadas. Tocat a sighiri a portai sèmpiri sa mascheredda, a abarrai atesu s’unu cun s’àteru e a si disinfetai is manus de sighida.
Manuela Ennas
