Partinde de su primu de cabudanne, sa tzertificatzione birde at a èssere a òbrigu pro trenos, traghetos, aeroplanos, ma fintzas pro is traballadores de s’iscola e pro atzèdere a s’universidade. Is règulas noas subra de sa tzertificatzione digitale birde ant a intrare in vigore difatis a pustis de una primu fase de impreu comintzada su 6 de austu coladu. Totu is chi traballant in su mundu de s’iscola e de s’universidadi – ma fintzas is istudiantes universitàrios – de cras ant a dèpere tando mustrare sa tzertificatzione birde Covid-19. Semper a partire de sa matessi die petzi chi est frunidu de tzertificatzione birde at a podere tènnere s’atzessu a s’impreu de aeroplanos pro su trasportu de persones; naves e traghetos pro servìtzios de trasportu interregionale, francu chi cuddos impreados pro is collegamentos marìtimos in s’Istrintu de Messina; trenos impreados in is servìtzios de trasportu ferruviàriu de passigeris , postales impreados pro servìtzios de trasportu de personas, postales impreados pro servìtzios de nolègiu cun ghiadore. S’impreu de àteros mèdios de trasportu podet acontèssere fintzas sena tzertificatzione birde, rispetende semper is mesuras contras a s’impestu, comente at fatu ischire su Guvernu. Sa tzertificatzione tocat a dda mustrare in ‘zona bianca’ ma fintzas in is zonas ‘groga’, ‘a colore de arantzu’ e ‘ruja’, in ue is servìtzios e is fainas siant cunsentidos.
Abarrant duncas is règulas adotadas in Itàlia de su 6 de austu coladu, chi prevident s’s’òbrigu de sa tzertificatzione birde pro atzèdere a is servìtzios de ristoratzione acumpridos de cale si siat esertzìtziu pro su consumu fatu sètzidos a mesa, in logu serradu; ispetàculos abertos a su pùblicu, atòbios e cumpetitziones isportivas; museos, àteros istitutos e logos de sa cultura e mustras; piscinas, palestras, isport de iscuadra, tzentros termale e de benèssere, sagras e fieras, cungressos; parcos temàticos e de disaogu; tzentros culturales, tzentros sotziales e ricreativos, pro totu is fainas cuncordadas a parte de intro, francu chi is tzentros educativos pro s’infàntzia e is fainas de ristoratzione e de giogu insoro. Comente semper, in prus, sa tzertificatzione at a dèpere atestare de àere fatu a su mancu una dose de vatzinu opuru èssere resurtados negativos a unu tampone molecolare o lestru in is 48 oras pretzedentes opuru de èssere sanados de su Covid-19 in is ses meses pretzedentes.
Ss tzertificatzione birde at a àere durada de 12 meses. Su Cts at dadu difatis unu parre a favore pro sa pròroga de noe meses a un’annu de s’iscadèntzia apustis de sa segunda dose de vatzinu. S’ammentat in prus chi s’òbrigu de sa tzertificatzione non tocat aplicadu pro atzèdere a is fainas e a is servìtzios subra de su territòriu natzionale a custas categorias de personas: a is pipios suta de is 12 annos, esclùdidos pro edade de sa campagna vatzinale; a is sugetos esentos pro resones de salude de sa vatzinatzione chi tenent peò tzertificatzione mèdica. Finas a su 30 de cabudanne 2021, podent èssere impreadas is tzertificatziones de esentzione fatas, a indonu, de is mèigos chi faint is vatzinus de is Servìtzios vatzinales de is Aziendas e Entes de is Servìtzios sanitàrios regionales o de is mèiogos de meighina generale o pediatras de lìberu sèberu de s’assistidu chi òperant in s’àmbitu de sa campagna de vatzinatzione anti-Sars-CoV-2 natzionale, segundu is modalidades definidas in sa Tzirculare de su Ministeru de sa Salude de su 4 austu 2021. Sunt bàlidos is tzertificados de esentzione vatzinale giai emìtidos de is Servìtzios sanitàrios regionales semper finas a su 30 de cabudanne; a is tzitadinos chi ant retzidu su vatzinu ReiThera (una o duas doses) in s’àmbitu de s’isperimentatzione Covitar. Sa tzertificatzione, bàlidas finas a su 30 de cabudanne 2021, tocat fata de su mèigu responsàbile de su tzentru de isperimentatzione in ue est istada fata, in base a sa Tzirculare de su Ministeru de sa Salude de su 5 de austu 2021.
Manuela Ennas
