A Casteddu pro sa de bator editziones de sighida torrat Climathon, sa maratona subra is giambamentos climàticos, organizada de sa Tzitade Metropolitana de Casteddu cun s’amparu de sa Regione Autònoma de sa Sardigna. S’avenimentu, nàschidu de una pensada de Climate-KIC, su prus organismu europeu de importu pro cantu pertocat s’adatamentu a is giambamentos de su clima, s’at a acumprire in su matessi tempus in 145 tzitades de totu su mundu chenàbura 13 de santandria cun una die dedicada in ue is chi ddoe pigant parte depent propònnere, comente in unu disafiu, ideas e solutziones innovativas a problemas ligados a su clima.
Su tema chi ant seberadu ocannu pro Climathon Casteddu 2020 est ‘Sa mobilidade in sa Tzitade Metropolitana in s’època de su Covid-19 e de is giambamentos climàticos: dae dificurtades a oportunidades de isvilupu sostenibile’, cun duas tareas de importu: a si mòvere in seguresa, cun s’analisi de solutziones capassas de cuntènnere s’impestu, smenguare su tràficu e reduire s’efetu de is mèdios de trasportu subra s’ambiente; sa connessione e sa digitalitzazione, est a nàrrere averiguare comente s’innovatzione digitale potzat reduire sa netzessidade de si mòvere dae domo pro atzèdere a is servìtzios pùblicos e privados.
Sende chi custa pandemia nos at postu dae in antis iscenàrios chi tenent un’efetu cun sa mobilidade, comente a sa didàtica a distàntzia, su traballu de domo, s’impreu de is veturas privadas in logu de is trasportos pùblicos, sa Tzitade Metropolitana est chirchende de respùndere a custas dificurtades cun solutziones cuncretas e cun s’agiudu de is tzitadinos, de is ideas e e de s’imbentu insoru, favorende sa relata intra de is territòrios, is amministratziones locales, sa chirca sotziale e econòmica. Solutziones capassas de pònnere in pare sa mobilidade sostenibile e is atziones de adatamentu de is giambamentos climàticos pro nde pesare una stratègia utilosa pro su benidore de s’ambiente.
Climathon Casteddu 2020, pro neghe de su Covid, dda’ant a fàghere in modalidade digitale sceti, in direta in is canales sotziales YouTube e Facebook de sa Tzitade Metropolitana e at a sighire pro tres dies. Pro partetzipare tocat a s’iscrìere ( est a in donu) in su giassu www.climathon.climate-kic.org/cagliari in ue s’agatant totu is informatziones e su programma de custa editzione.
Manuela Ennas
