Certificatzioni birdi e òbrigus nous

De oi, su 15 de mesi de ladàmini, is traballadoris de su setori pùblicu e privau funt obrigaus a tenni sa certificatzioni birdi po su Covid 19. Po is chi si presentant in su logu de traballu chena de ammostai sa tzertificatzioni ddoi ant a essi santzionis grais. Su presidenti de su Consillu Draghi at difatis firmau su Dpcm chi donat is arrègulas po averiguai sa certificatzioni in is logus de traballu, fintzas a su 31 de mesi de Idas.

Po essi prus pretzisus,po su decretu, su traballadori chi , mancai podendi, no tenit o no ammostat sa certificatzioni est de cunsiderai comenti unu chi ammancat de su traballu chena de tenni arrexonis chi ballant e duncas nci perdit su diritu de sa paga. Su decretu previdit chi is privaus podint suspendi is traballadoris leugu etotu, po amparai sa seguresa e sa saludi de is àterus traballadoris; invècias, po su traballu pùblicu, sa suspensioni lompit a pustis de cincu diis chi unu no si presentat chena de tenni arrexonis chi ballant. A is chi imbucant a traballai chena de sa certificatzioni ddis podit lompi unu provedimentu de su Prefetu e una contraventzioni chi andat de 600 fintzas a 1500 èurus. Su decretu prevedit contraventzionis e àterus provedimentus disciplinaris puru po chi si ponit contras e no permitit s’averiguamentu de sa certificatzioni, e aici etotu a is meris de su traballu chi no faint is averiguamentus netzessàrius in arrispetu de is arrègulas. S’òbrigu pertocat puru is chi faint parti de assòtzius de voluntariau, is chi càstiant is pipius o atendint is domus allenas, is chi tenint unu traballu autònumu e tenint sa partida Iva.

Po su chi pertocat invècias sa possibilidadi de tenni sa certificatzioni cun is tamponis, su decretu at stabiliu po is potecarias s’òbrigu de assegurai su prètziu po custa genia de test a 15 èurus po is mannus e a 8 èurus po is pipius e piciocheddus. Is chi no podint fai su vatzinu po arrexonis certificadas de saludi ant a podi fai su tamponi chena de depi pagai nudda.

Manuela Ennas

Atividade realizada cun su contributu de sa Regione Sardigna – IMPRENTAS 2020-2021.
LR 22/2018, art. 22
Attività realizzata col contributo della Regione Sardegna – IMPRENTAS 2020-2021.
LR 22/2018, art. 22

Total
1
Shares

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Загрузка...
Related Posts
Total
1
Share