Est bessida de pagu una pellìcula de su regista Paolo Carboni po contai s’ànima de Casteddu e de is casteddajus in is annus ’60. Comenti fiat sa tzitadi in cussus annus? Cali fiant is dudas e is speras po su benidori? Comenti fueddàt sa genti? E de ita fueddàt? A custas e fintzas a àteras preguntas parit arrespundi Casteddu sicsti, una pellìcula a mesu mesu tretu intra de documentàriu e contu, chi tirat una fotografia fìdeli a una sotziedadi chi fiat mudendi cun is tempus, chi circàt de camminai a passu cun sa modernidadi ma fiat, e ancora est, acapiada a un’identidadi forti e cun arreìxinis fungudas.
Su progetu, chena de nc’arrui in cussas operatzionis de nostalgia chi incapitat de biri in su tzìnema, movit de unu sentidu de amori de su regista po sa tzitadi e nascit cun sa tarea de firmai unu pagu su tempus, allogai is arregordus e sarvai, asumancu aici, cussa parti de Casteddu chi arriscat de sparessi. Sa trama su regista dd’at cosida apitzus de s’impreu de pellìculas originalis de is annus ’60, pruschetotu filmadas de genti chi no fiat de su mestieri ma mancai teniat una cinepresa in domu e si ddoi spassiàt. Pellìculas chi oi fait a agatai in s’archìviu de sa Cineteca Sarda, chi at liau parti a custu progetu e chi de annus meda traballat po fraigai una memoria stòrica de sa Sardìnnia. A ndi bogai a pillu ammentus, contus, arrastus, atuamentus e fueddus de cussa Casteddu amachiada avatu de Giggiriva, funt tres amigus chi s’atobiant in sa butega de su barberi e cumentzant a fai scioru cumpartzendi arrexonamentus e brullas, e torrendi a essi comunidadi, cosa chi oi, giai giai, no esistit prus. De aici intendeus boxis diferentis, boxis de testimòngius berdaderus de cussus annus e boxis de atoris chi s’ammesturant a pari donendi vida a una faina deaveras de calidadi.
Is boxis e is caras, acumpangiadas de sa mùsica de is Dancefloor Stompers, funt is de Nino Nonnis, Giampaolo Loddo, Giulio Manera, Piero Marcialis, Carlo Porru, Rossella Faa, Giuseppe Boy e de Elio Turno Arthemalle. Sa cosa de importu de custas boxis est chi fueddant in sardu, su sardu de Casteddu, cun cussa fonètica e cussu lèssicu chi mudant fintzas de apendìtziu in apendìtziu cun totu sa richesa de is diferèntzias chi no partzint, comenti a dolu mannu acostumaus a pensai, ma donant bellesa e sulidu a sa lìngua nosta. Sighendi is sentidus de su Babel Festival, chi promovit su tzìnema in is lìnguas de minoria e innui Paolo Carboni traballat de meda, Casteddu sicsti s’ammostat chi custa coja intra de tzìnema e sardu si podit agiudai a cumprendi mellus sa stòria e sa vida e podit essi aina po amparai duas maneras de espressai, chena de stereòtipus, sa cultura nosta
Manuela Ennas
