Sa Cancel culture est una forma moderna de ostracismu chi punnat a un’istesiadura, una bogadura de cussos produtos culturales, de cussas personas o de cussas aziendas incurpados de discriminatzione in is cunfrontos de minorias, etnias, gèneres e pensamentos, mescamente a pustis de decraratziones o acadessimentos chi ofendent.
Cumentzende de sa pellìcula “Via col vento” (bogadu de su catàlogu HBO in antis de dd’àere torradu a ammìtere cun un’introduida ad hoc) fintzas a lòmpere a Pepé Sas Pew, personàgiu de is cartones animados de Looney Tunes, chi no at a cumpàrrere in su sècuel de Space Jam in cantu diat pàrrere maschilista e apuriosu e, segundu su parre de Charles M. Blow, editorialista de su New York Times, diat promòvere sa violèntzia contra a is fèminas, oe sa Cancel culture est chistione de ogni die.
Cancel culture est una de is espressiones prus impreadas in is ùrtimos tempos ca ogni die is mèdios massivos nos contant de calchi chistione chi pertocat custu argumentu. Ma ite cheret nàrrere “cancel culture”? A dda definire est sa parte prus difìtzile, fintzas ca custa manera de nàrrere est nàschida in is Istados Unidos, at pigadu àteros significados e in Itàlia est arribbadu fintzas a una versione no originale de custos significados.
In su 2019 su ditzionàriu australianu Macquarie at seberadu “cancel culture” paràula de s’annu e cheret nàrrere “s’atitudine a intro de una comunidade chi recheret o determinat su ritiru de s’amparu a unu pessonàgiu pro àere ideas o cumportamentos sballiados. Ddoe at posca chi narat chi sa Cancel culture punnat a eliminare e tando burrare is rastros de unu passadu caraterizadu de balores e ideales chi sunt atesu de is tempos nostros, comente sa cultura patriarcale e s’òdiu ratziale.
Chi bortamus a manera literali diamus nàrrere“cultura de s’annullamentu” o “cultura de s’iscantzelladura”. Andende ultres a sa tradutzione literale, dda podimus definire una forma moderna e atuale de ostracismu in ue personas, marcus de moda, trumas cummertziales benint postos a una banda , cun una bogadura giai totale de is retzas sotziales e professionales. In pagos faeddos s’acabbat deretu de suportare su nùmene in chistione, reu de àere naradu opuru fatu calicuna cosa chi ofendet meda e non tenet respetu pro una calchi categoria.
S’espressione “Cancel culturas” tenet una connotatzione bastante negativa ca su burrare no est mai una solutzione binchidora: sa pràtiga millenària de su cuare su prùere suta a unu tapete no at mai donadu frutos bonos, antzis… Duncas sa cultura de s’iscantzelladura, ultres a lesiare in calchi manera is deretos de sa libertade de espressione e a aplicare in manera tropu radicale su “politically correct”, sunt in medas a dda cuntrastare.
Sa Cancel calture pertocat fintzas su ratzismu, su maschilismu, sa misoginia (s’òdiu pro is fèminas), s’omofobia (s’òdiu pro is omosessuales) e is molèstias sessuales. Ultres a burrare òberas de ingegnu, istàtuas e cale si siat cosa potzat èssere sìmbulu de unu passadu ratzista e schiavista, sa Cancel culture andat a corfire fintzas personalidades famadas chi mustrant de èssere portadores de ideas e cunsideros de tipu maschilista, misòginu e/o omofobu. Sa lista est longa meda e pertocat fintzas su mundu de is cantantis e de sa mùsica. Pro nde contare una su rapper Eminem est stètiu in mesu a una dibata in is retzas sotziales e sa Gen Z at pedidu cun totu is sentidos chi is cantzones suas bèngiant bogadas de TikTok in cantu portadoras de ideas misòginas.
Manuela Ennas
