Ocannu puru, mancai is dificurtadis acapiadas a s’apretu de su Covid-19, de su 27 a su 30 de austu torrat in su tzentru de Gùspini su Fèstival literàriu “Bimbi a bordo” dedicau a is pipius. Custa est sa de otu editzionis e ancora una borta is atòbius ant prenai de cultura is bias de sa bidda e pruschetotu su burgu de is Domus a Corti.
Su fèstival, nàsciu de una bidei de s’assòtziu In Coro e cun sa ghia scientìfica de Mara Durante, pedagogista e professora in s’Universidadi de Casteddu, s’est ammanniau me is annus po mori de s’aficu e de sa passioni de is organizadoris fintzas a diventai unu de is prus atòbius apretziaus de su setori de s’editoria po pipius e piciocheddus. Po su Campidanu de Mesu “Bimbi a Bordo” arrapresentat unu mamentu de aprofondimentu e de cunfrontu ca est una jenna aberta po autoris e scritoris chi s’agatant a pari po seminai cultura intra de is prus giòvanus e incarrerai tretus nous po su benidori de sa literadura.
S’argumentu de ocannu, sceberau in antis de s’emergèntzia Covid-19, est ‘Visti dall’Alto. Visioni e Intra-Visioni dell’Umano’, chi sonat giai giai comenti a un’antibitzu, sendi chi su tema donat atentu pròpiu a sa bisioni chi is mannus tenint de sa cultura de sa pipiesa, ca a bortas no benit tenta in consìderu e no benit nemancu cumprèndiu s’importu chi podit tenni in s’annèstriu. Ma bisionis funt puru is chi acumpàngiant is arregordus de sa pipiesa e s’agiudant a cresci, e a no perdi sa spera puru in tempus fadiosus che custus chi seus bivendi. Aìnturu de is arrexonus de ocannu ddoi est puru s’abbisòngiu de mantenni sèmpiri unu sentidu umanu, su chi pertocat s’òmini, sa genti e totu s’umanidadi, chi tocat sarvau mancai in mesu a is stentus de sa vida.
E difatis, castiendi-sì de asuba, donniunu de nosu est unu puntineddu cun is caraterìsticas suas ma impari a totu is àterus puntineddus, parreus una cosa sceti, ca su essi de bonucoru est su ligòngiu chi s’apoderat s’unu cun s’àteru. E duncas “Bimbi a bordo” at a acolli a totus cun sa tarea de difundi s’amori po is lìburus e lassai lìberu s’imbentu cun atividadis cuncordadas po dònnia edadi. In prus ocannu, in acòrdiu cun su ministeru de s’Istrutzioni Pùbrica, ddoi ant a essi cuàturu atòbius chi donant puntègiu po sa formatzioni de is dotzentis.
A custa editzioni ant a liai parti Barbara Schiaffino, dirigidora de su giornali de literadura po sa pipiesa Andersen chi apariciat dònnia annu su “Prèmiu Andersen”, su prus de importu de custu setori, Gek Tessaro, Alicia Baladan, Lamberto Maffei, Eraldo Affinati, Silvia Vecchini, Sualzo, Francesco Tonucci, David Conati, Alessandra Lazzarin, Andrea Pau, Anna Lavatelli, Azzurra D’Agostino, Filomena Cinus, Francesca Pusceddu, Francesco Cubeddu e Manuela Dibella, Guido Quarzo, Daniele Mocci, Laura Braga, Marina Girardi, Roberta Balestrucci.
In prus, po afortiai sa collaboratzioni cun su territòriu, pigant parti a su fèstival sa “Biblioteca per Ragazzi” de Casteddu, su Sistema Bibliotecàriu Monti Linas e su Sistema Bibliotecàriu de su Surcis e s’assòtziu Chine Vaganti po su chi pertocat is fumetus. Naraus chi is isterridas po un’àtera arrennèscida nci funt totus e de seguru Gùspini no at a lassai delùdiu su mundu de is letoris.
Manuela Ennas
