Promòvidu de Sardegna Ricerche, Bi.Ar. est unu progetu chi pertocat is birras artigianales e s’impreu chi si diat a podere fàghere de is iscartos de sa traballadura de custu bufòngiu. Unu percursu chi Sardegna Ricerche at incarreradu a pustis de àere chèrfidu respùndere a is bisòngios de 34 impresas isolanas, mescamente aziendas chi traballant in su setore de sa laurera e laboratòrios chi produsint birras artigianales e chi ant leadu parte a sa progetatzione, cun is espertos de sa Porto Conte Ricerche de S’Alighera, de s’Universidade de Tàtari e de sa Sotacarbo de Carbònia.
In sa primu fase de Bi.Ar. ant istudiadu e seberadu is variedades locales de laore e de òrgio adatos a sa produtzione. Sa tarea de lòmpere est sa de produire unu sabore totu sardu a manera de non cunfùndere sa sarda cun àteras birras. In S’Alighera sunt traballende fintzas subra de is fruit beer, is birras cun aromatu de frutora, pruschetotu subra de is calidades de su piricoco “busucciu“. “Sardegna Ricerche est ponende risursas de importu pro sustènnere progetos cluster, est a nàrrere progetos cumpartzidos de impresas non mannas meda chi traballant in su matessi setore e chi movent de is bisòngios de innovatzione de su mundu produtivu. Maria Assunta Serra, commissàriu straordinàriu de Sardegna Ricerche, at contadu de comente sa collaboratzione cun sa sotziedade Porto Conte Ricerche siat de profetu pro unu suportu sientìficu e tecnològicu de primore e, paris cun s’Universidade, siat capassa de ghiare e acumpangiare is impresas sardas a megiorare is calidades insoru pro cumpètere in unu cuntestu econòmicu semper prus ispetzializadu.
A intro de su progetu ddoi at fintzas noas tecnologias chi punnant a reduire su consumu energèticu. Difatis is laboratòrios de birra cada annu s’agatant a dèpere ispèrdere finas a 36.000 chilos de iscartos de sa imbuconadura de sa birra. Iscatos chi diant pòdere devènnere, favorende gasi un’economia tzirculare, unu concime adatu fintzas a sa laurera biològica, comente ant acraradu is microbiòlogos de s’Universidade de Tàtari. Custos iscartos tenent fintzas unu àtera possibilidade de impreu: podent èssere mudados in unu bio-carburante capassu de remplasare su Gpl o de alimentare is machinàrios in su protzessu de produtzione de sa birra.
Manuela Ennas
