Dae su primu de ghennàrgiu est a disponimentu, in su giassu internèt de s’Inps, sa protzedura pro sa rechesta de s’assegnu ùnicu universale pro sos fìgios a càrrigu (Auu), chi s’Inps at a currispòndere diretamente. Is rechestas at a fàghere a ddas presentare in totu su perìodu de s’annu ma pro pòdere retzire s’assegnu giai de su mese de martzu, data de s’intrada a regìmene de su benefìtziu nou, est netzessàriu a presentare sa dimanda intro de su mese de ghennàrgiu, pregontende a unu patronadu (su servìtziu est a indonu) o protzedende in manera autònoma in su giassu de s’Inps. Pro pòdere presentare sa dimanda in su giassu de s’Inps bisòngiat èssere in possessu de s’Identidade digitale (Spid). S’assegnu ddu podent rechèrrere totu is traballadores dipendentes, siat pùblicos chi privados, is traballadores autònomos, is chi sunt giai in pensione e fintzas is chi non tenent traballu. S’Auu dd’at introduidu su D. Lgs. 230 de su 21 de mese de nadale coladu e sostituit, francu de su bonus pro s’asilu-nidu, totu is benefìtzios reconnotos fintzas a como dae s’Istadu pro sos fìgios a càrrigu, cumpresas sas detratziones.
S’assegnu tocat pro ogni fìgiu minore a càrrigu e pro cada fìgiu de edade magiore a càrrigu finas a lòmpere a is 21 annos. Pro fìgios a càrrigu si cheret nàrrere is chi faghent parte de su nùcleu familiare indicadu in su documentu Isee. S’Isee est s’elementu netzessàriu pro istabilire de cantu est s’assegnu, a segunda de sa partitzione Isee de apartenèntzia. Chie no est in possessu de Isee o chie tenet un’Isee prus artu de 40.000 èuros at a pigare sa tzifra mìnima de s’assegnu, est a nàrrere 50 èuros. Pro decraratziones Isee prus bàscias de 15.000 èuros s’assegnu at a èssere de 175 èuros a su mese. A custa base si podent annànghere àteros acreschimentos comente cando in sa famìlia ddoe sunt fìgios cun disabilidades o prus fìgios a càrrigu.
Sa rechesta pro benefitziare de s’assegnu balet pro un’annu e pertocat is mensilidades in su perìodu intre de su mese de martzu de s’annu in cale benit presentada sa dimanda e su mese de freàrgiu de s’annu a pustis.
Massimiliano Meloni
