Artimanos est su nòmine de unu sòtziu nàschidu in su 2012 gràtzias a sa pensada de 21 artesanos chi mancari traballende in setores artìsticos diferentes e mancari impitende materiales de dònnia genia comente s’oro, su ferru, sa prata, sa linna, su pannu, sa seda, su bidru, ant detzìdidu de si aunire a pare cun sa punna de promòvere is atividades insoru e prus in generale de cumpartzire sa cultura de is artesanos sardos. Ca is fainas e su traballu de s’artista est cosa nodida e dilicada, capassa de nde bogare a pìgiu is sentidos prus fungudos e de ddos mudare in òberas ùnicas Pro custa resone s’òbera no est petzi unu produtu po bèndere ma est unu mètidu pro espressare s’identidade e totu su chi est ligadu a sa traditzione, a cussu connotu chi passat de generatzione in generatzione, cun respetu pro su tempus passadu ma cun un’interessu chi giambat die pro die e una mirada cara a su tempus benidore. Un’idea forte, in prus de sa tarea sotziale e culturale de ua movet su progetu, est sa de incarrerare e favorèssere formas de “partetzipatzione ativa” de is artesanos, pro cuncordare in pare e sighire su protzessu de totu is fases de produtzione e sa relata cun sa gente chi est interessada a custa genia de manufatos e mescamente cun su mercadu e is istitutziones, aberrende una janna cun cussa burocratzia chi a bortas smenguat sa gana de aviare atividades gasi e duncas sa possibilidade de renèssida in su traballu e in sa vida puru.
Duncas in is manos e is mente de Artimanos passat s’imbentu, su valore artìsticu, u disìgiu de sarvare tretos de identidade e espressiones culturales de unu pòpulu intreu, sa punna a cussa unidade chi nos murrungiamus semper de non tènnere, castiende a is dificurtades imbetzes de avalorare is calidades chi tenimus. Is laboratòrios ddos agatamus in totue in Sardigna e dònnia borta chi cuncordant fainas pro mustrare is resurtados de su traballu insoru est una scoberta chi lassat ispantados e chi tenet semper de contare de custa terra nostra e de s’abilesa de is mastros artisanos.
Manuela Ennas
