In cale manera su patrimòniu istòricu, is traditziones, is benes culturales, is logos e s’archeologia de sa Sardigna podent èssere in relata cun artistas, artesanos e creativos? Subra de custu arresonu e gràtzias a is contributos de su bandu IdentityLAB de sa Regione Sardigna est nàschidu ArtExhibition,unu progetu multimediale de Arionline, Karel e Bibigula cun sa regia de Davide Melis e sa diretzione artìstica de Raffaella Venturi. A donare meleda pro su progetu e a ddu ghiare virtualmente est Maria Lai, s’artista de Ulassa, famada pro àere repuntadu e tèssidu su mundu artìsticu cun linguàgios noos e sena de làcanas.
ARTExhibition at a cumentzare in is chidas imbenientes e at a sighire pro un’annu, fintzas aprontende ses episòdios de una sèrie pro su web, una pellìcula curtza, unu giassu internet, un’aplicatzione digitale pro agatare is logos de importu pro su progetu. Totu at a èssere in italianu, inglesu e sardu. Sa tarea, lassende a un’ala is tratos folclorìsticos in ue est fàtzile a rùere, est sa de iscobèrrere e agatare su ligàmene intra de is raighinas de s’identidade sarda e s’arte cuntemporànea pro mèdiu de sa boghe e de sa chirca de deghe artistas chi ant seberadu sa Sardigna comente logu de istùdiu e de s’arte issoro. Is artistas, totus diferentes pro setore artìsticu e pro tècnicas espressivas, sunt Anna Marceddu, Thierry Konarzewski, Josephine Sassu, Rita Correddu, Giovanni Casu, Eugenia Pinna, Antonio Fogarizzu, Marco Nateri, Luciano Bonino e Antonello Cuccu.
Pro contare totu su chi est incapitende in custos meses de imbentu, ddoe ant a èssere Renate e Janet, duas pitzocas istràngias chi giughent in Sardigna pro una chirca documentària. Is atoras pro custu ruolu ddas ant a seberare luego is de Casting Sardigna. At a fàghere a sighire ogni fase de su progetu mescamente gràtzias a su traballu de documentzione digitale in su giassu internet chi pertocat ArtExhibition e in is canales vìdeu youtube e vimeo.
Manuela Ennas
