In ocasioni de sa Dì mundiali de is abis chi si festat su 20 de maju de candu s’Onu dd’at istituida in su 2018, sa Coldiretti (Confederatzioni Natzionali Coltivadoris Diretus) at fatu sciri chi sa produtzioni de meli ocannu est calada meda in totu Itàlia, asumancu de su otanta po centu contras a is annus passaus. Custu disacatu est acontèssiu po nexi de is mudaduras de su clima e de is fenomenus metereològicus chi ant smenguau sa froridura faendi aturdiri is abis chi no agatant su pòddini de suspiri. Custu ùrtimu ierru callenti e unu beranu pagu firmu e baddinosu ant fatu dannu a is casiddus de is abis e s’arresurtau est chi is abis dd’acabbant a si papai su pagu meli chi ant prodùsiu po podi sighiri a bivi.
Is dificurtadis de is abis arrapresentant unu perìgulu mannu po sa biodiversidadi sendi chi funt un’indicadori de importu de sa saludi de s’ambienti e funt de agiudu a sa laurera po su traballu insoru de impollinadura. Is stùdius narant chi un’abi, in una dì, est capassa de bisitai seti milla froris po ndi boddiri su pòddini e chi, po produsi unu chillu de meli, nc’at abbisòngiu de cuàturu millionis de custas bìsitas de is abis. E aici puru, a cantu narat sa Far, su frutai de coltivatzionis medas dipendint de s’impoddinadura de is abis, comenti sa mela, sa pira, su meloni, sa sìndria e sa cerèxia. Su dannu, mancu a ddu nai, est econòmicu po su mercau ca su meli no bastat po sa rechesta de is italianus e tocat a nd’importai de àterus logus.
Naraus chi me is mesas de is italianus, de tres botixeddus de meli, duus ndi lompint de foras, funt èsterus. Is assòtzius po sa tutela de is consumadoris consillant de averiguai beni s’orìgini me is etichetas de is botixeddus po s’assegurai de sa sintzillesa e biri chi su meli ndi lompit de coltivatzionis Ogm, chi no funt ammìtias in su territòriu natzionali italianu ma in àterus logus eja, comenti in Cina po nai. In Itàlia a oi nci funt prus de sessanta milla abiarxus e esistint prus de sessanta calidadis de meli diferentis po su logu innui is abis sùciant su pòddini. In Sardìnnia puru custa est annada mala, ca in s’ierru no at pròpiu, immoi seus giai incarrerendi in tempus de sciutori e duncas sa regorta beranili de su pòddini s’est torrada a pagu cosa.
Su censimentu annuali narat chi in Sardìnnia nc’iant a depi essi 1676 abiarxus e 66.77 mojus ma sa chistioni de su benidori po custu setori est dilicada e dudosa poita ca is traballadoris est de tempus meda chi no tenint agiudus po su sciutori de is annus passaus e duncas su mercau est sunfrendi, no arrennèsciit a si ndi torrai a strantaxai e ocannu arriscat una farta prus manna meda. Tocat duncas a meledai a pitzus de s’importu chi tenint is abis in sa vida nosta e ddis tenni arrispetu cun s’amparu de s’ambienti innui biveus, si no boleus chi si nci morrant e dd’acabbint de essi profetosas in s’echìlìbriu de sa terra.
Manuela Ennas
