Segundu is ùrtimus datus de Confartigianato Sardegna, in Sardìnnia arresurtat impestada po nexi de su nùmeru tropu artu de veturas chi faint dannu a s’ambienti. Po dd’amparai in su benidori iat a tocai a ndi promòviri un’impreu prus sustenìbili sceberendi mancai veturas ìbridas o elètricas. Provaus a biri cantu funt is veturas chi circulant in s’ìsula? A cantu si ligit in su documentu de Confartigianato in Sardìnnia si contat giai unu millioni de veturas e su 39,5 po centu, est a nai sa bellesa de 423milla, tenit assumancu 15 annus de edadi. Cun custus nùmerus s’ìsula s’agatat a su de seti postus intra de is regionis cun veturas prus bècias
Is sardus chi invècias tenint una vetura ìbrida o elètrica po immoi funt 4.077. Is meris de veturas elètricas funt 253, mentras is chi impreant po biaxai veturas ìbridas funt 3.824. Si poneus a cunfrontu custus datus cun cussus bessius in su 2017 bieus chi is veturas elètricas funt crèscias de su 65 po centu e is veturas ìbridas de su 43,5 po centu. A cantu ligeus in is pàginas de sa circa, chi sa Confartigianato at fatu po averiguai sa saludi de s’ambienti e po cumprendi mellus cantu siat in perìgulu, sa provìntzia chi sunfrit de prus po sa presèntzia meda de is veturas est sa de cabu de giossu, innui s’agatant s’86, 9 po centu de is veturas cun unu motori prus bàsciu de s’èuro 4. Is veturas naraus prus giòvanas funt immatriculadas in sa provìntzia de Casteddu, innui si contat su 33 po centu de is veturas cun motori prus bàsciu de s’èuro 4. Sa tzitadi de Nùgoro tenit su parcu veturas prus bèciu, ca is chi tenint prus de 15 annus de edadi funt sa bellesa de su 48 po centu.
Custus arresurtaus ammustant chi in s’ìsula nosta tocat a traballai ancora meda po sa promotzioni de is veturas capassas de fai prus pagu dannu a s’ambienti. Maria Amelia Lai, sa presidenti de Confartigianato Impresas Sardìnnia, at fatu cumprendi chi po melliorai sa chistioni, in prus de is bonus de agiudu chi donat su Guvernu, iat a serbiri una punna prus manna fintzas po ndi pesai impresas noas in custu setori, mancari aìnturu de unu programma prus mannu po favoressi sa sustenibilidadi e s’amparu de su terrritòriu.
Manuela Ennas
