Ajajaus in internet est unu programma de alfabetizatzioni digitali po sa de tres edadi, promòviu de sa Fundatzioni Mundu Digitali. In custa faina is giòvanus agiudant is personas prus ananti cun s’edadi, mescamenti cun prus de 60 annus, a gherrai s’esclusioni sotziali, fraighendi un’alleàntzia profetosa intra de scolas e tzentrus sotzialis. Su progetu, cumentzau in su 2002, pertocat po su 2021 s’alfabetizatzioni digitali de sa de tres edadi , cun sa produtzioni de materialis on demand (comenti vìdeus curtzus, ghias in lìnia), s’acumpangiamentu a distàntzia (comenti s’ agiudu donau a su telèfonu) de sa populatzioni de is mannus a s’impreu de is servìtzius digitalis de sa pùblica amministratzioni e de sa sanidadi, sa formatzioni de “animadoris” digitalis e territorialis e sa sperimentatzioni de totu is trastus chi serbint po intrai in relata cun su mundu de internet.
Acurtziai sa generatzioni asuba de is 60 annus a sa tecnologia, favoressi sa comunicatzioni intra de ajajus e nebodis, promòviri s’alfabetizatzioni informàtica e s’inclusioni digitali funt is tareas de is organizadoris de custu progetu, nàsciu po propassai su divàriu digitali intra de generatzionis diferentis e difùndie spainai sèmpiri de prus sa connoscèntzia informàtica intra de sa populatzioni. “Su ‘digital divide’ –ant nau is rapresentantis de custa faina – rapresentat sa frontera chi partzit is economias e is sotziedadis svilupadas de cuddas no svilupadas: no sceti intra paisus e àreas pòberas de su mundu, ma aìnturu de dònnia paisu, e fintzas in su nostu”. Su progetu ‘Ajajus in Internet’ est po cussas personas chi po edadi o po cunditzioni sotzialis, culturalis o econòmicas arriscant de abarrai esclùdias de sa sotziedadi de sa connoscèntzia, chi oramai no podit fai de mancu de biaxai in internet. Oferri unu cursu de alfabetizatzioni informàtica, segundu sa fòrmula proposta de custu progetu bolit nai fintzas a gherrai contras is formas noas de analfabetismu e cuntrastai s’arriscu de una partzidura sotziali e comunicativa intra de giòvanus e mannus”.
Fainas che custa donant sa possibilidadi de pigai pràtiga cun is tecnologias de s’informatzioni e de sa comunicatzioni, afortiendi aici una tzitadinàntzia ativa prus berdadera e responsàbili in sa sotziedade de oi. A su progetu, ddu torraus a nai, podint liai parti is chi tenint prus de 60 annus de edadi, mellus si iscritus a is tzentrus sotzialis. Po dònnia scola chi acollit su progetu e si ponit a disponimentu, benint sceberaus 25 partetzipantis. Is dotzentis funt is piciocus de sa scola ghiaus de unu dotzenti espertu de tecnologias informàticas e telemàticas. Is cursus po is partetzipants est a indonu e ddus tenint n is àulas informàticas de is scolas o postas a disponimentu de su comunu o de is bibliotecas. Su cursu est de 30 oras cun cuìndixi atòbius de duas oras a sa cida. In su mentris de su cursu is partetzipantis podint torrai a castiai is letzionis giai fatas gràtzias a unu manuali realizau ad hoc de su Cunsòrtziu, chi benit arregallau a is iscritus, imprentau a lìteras mannas, segundu critèrius po un’impreu prus simpli e a manera chi siat prus fàtzili a ligi.
Ma is novidadis no acabbant innoi. In prus de acurtziari is ajajus a s’impreu de is trastus digiatlis e a biaxai in su mundu de internet, a comunicai cun sa posta eletrònica e impreai is servìtzius digitalis de is pùblicas amministratzionis, dònnia editzioni si fait prus arrica de unu traballu multimediali chi tutor e ajajus pesant impari in su cursu faendi pràtiga: de sa redatzioni de unu ditzionàriu in lìnia, de sa lista de is giogus de unu tempus a su vademecum multimediali po “abarrai sèmpiri giòvanus”. Una de custas fainas est stètia sa realizatzioni de su Libru mannu de sa Saludi, un’arregorta de consillus po fai una vida sana, dedicadu a ajajaus e nebodis, e nàsciu de unu traballu cumpartziu in retza de totu is partetzipantis a is cursus. Is materialis prodùsius fait a ddus biri giai sèmpiri a s’acabbu de su cursu in su giassu internet www.terzaetaonline.it. A custu ligàmini ddoi funt puru totu is informatzionis po is ajajus e is scolas chi tenint praxeri de liai parti a su progetu.
Manuela Ennas
