Is efetus de s’apedèmia asuba de sa serrada de is scolas e asuba de is giòvanus ndi bessit a pillu puru de su traballu de is magistraus chi arrecint is comunicatzionis de abbandonu o interrutzioni de sa frecuèntzia. Faint spantu is nùmerus de Casteddu e Nàpoli, innui is Procuras de is minoris ant pediu sa collaboratzioni de is istitutzionis, de is Comunus a pruschetotu de is servìtzius sotzialis.
A sa Procura de is minoris de Casteddu, sceti in unu mesi, funt arribbadas 300 comunicatzionis de abbandonu o de interrutzioni de sa frecuèntzia scolàstica cunfronta a is 700 fascìculus abertus in mèdia in un’annu. Aici etotu ponint in pensamentu is datus arregistraus in is ufìtzius de Nàpoli: in unu mesi e pagu prus asuba de sa mesa de sa procuradora Maria de Luzenberger Milnernsheim funt lòmpias de is scolas 900 comunicatzionis de abbandonu cunfronta a is 400 lòmpias po totu s’annu passau. Duncas a ponni a sa lerta funt is magistraus de is tribunalis po is minoris chi si funt abizaus de una chistioni chi no lassat dudas: sa didàtica a distàntzia, s’ausèntzia de s’iscola in presèntzia at fatu cresci a dismisura s’abbandonu scolàsticu.
Un’arresurtau chi no pertocat sceti su meridioni de Itàlia ma fintzas sa Lombardia innui s’assessori regionali po sa Pùblica Istrutzioni Fabrizio Sala at cunfirmau chi in un’annu is abbandonus funt passaus de su 12,6% a su 15,7%, pruschetotu intra de is piciocheddus. A nai sa beridadi funt pagus is ufìtzius scolàsticus regionalis chi tenint datus pretzisus in contu de custu fenòmenu. In Piemonte su dirigenti de s’ Usr Fabrizio Manca est circhendi de averiguai is nùmerus e is arrexonis de custu fenòmenu e at pediu agiudu a Save the Children, Ires Piemonte e Universidadi. Su datu natzionali prus recenti est de s’Istat e pertocat su 2019 cun su 13,5% de abbandonu de giòvanus intra is 18 e is 24 annus.
Difatis s ùnicu assòtziu a tenni unu còmpudu de is cunsighèntzias de sa crisi sanitària in sa scola est pròpiu Save the children chi in collaboratzioni cun s’istitutu de sondàgius Ipsos at presentau su 5 de gennàrgiu passau un’iscumbata de innui ndi bessit a pillu chi “su 28% de is piciocheddus decrarat chi de su cumintzu de s’apadèmia asumancu unu cumpàngiu de classi at acabbau de frecuentai sa scola”. Perou a si nd’acatai de s’agravamentu de sa situatzioni e a circai de arrimediai funt is procuradoris de is minoris.
Anna Cau, procuradora in Casteddu, ananti de custu discumbèniu, at detzìdiu de intervenni. Difatis at pediu a is dirigentis scolàsticus de comunicai su livellu de abbandonu scolàsticu, donendi pruschetotu atentu a s’abbandonu de is letzionis e a sa frecuèntzia irregulari in custu ùrtimu annu. S’arrespusta no est trigada a arribai e at postu in pistighìngiu sa procuradora: “Si seus agataus ananti nùmerus de timmi. Eus cuncordau luegu etotu averiguamentus cumpartzendi su traballu cun is servìtzius sotzialis po lompi a una collaboratzioni de is famìlias. Si nci funt situatzionis de abbisòngiu est unu deretu po issus a tenni assistèntzia. Apu fintzas intregau una lìtera a is famìlias po informai is babbus e is mammas de is ausèntzias de is fillus”. Sa majoria de is 300 comunicatzionis arribbadas in custa trinta diis pertocant sa scola segundària de primu e segundu gradu ma ddoi at abbandonus fintzas in sa scola de sa pipiesa.
“Funt abbandonus – at spricau sa procuradora Cau – acapiaus a s’annu de scola in didàtica a distàntzia e a s’intermitèntzia de is letzionis. Est mancau su traballu de movitiva: is piciocus si funt intèndius solus e no nci dd’ant fata. Dd’ant pagada mescamenti is prus dèbilis”.
Parti 1/2
Manuela Ennas
