Su Ces (Consumer Electronic Show) de prus de 40 annus est sa prus fiera de importu de su mundu dedicada a su setori de s’annoadura, innui is aziendas multinatzionalis presentant solutzionis noas destinadas a mudai su scenàriu tecnològicu globali. Su Ces dd’aparìciat s’assòtziu de categoria de setori Cta (Consumer Technology Association), cun sa tarea de ammostai is novidadis tecnològicas e is prus produtus innovativus chi ant a intrai in su mercau in su cursu de s’annu. S’ùrtima editzioni in antis de s’apedèmia de Covid-19 fiat acabbada in su gennàrgiu de su 2020 e aiat acòlliu sa bellesa de 170.000 visitadores e 2.300 aziendas in espositzioni. Si s’editzioni de su 2022 fiat unu pagu smenguada sèmpiri po nexi de su Covid sa de ocannu est torrada a tonu e fintzas po s’Itàlia at arrapresentau un’oportunidadi manna po si fai connosci e apretziai intra de is realidadis prus significativas in tema de tecnologia. Difatis aìnturu de su padiglioni italianu in s’Eureka Park ghiau de ITA (Italian Trade Agency), s’Agèntzia pro sa promotzioni a s’èsteru e s’internatzionalizatzioni de is impresas italianas, ddoi fiant 51 startup italianas, est a nai impresas noas. In In sa primu cida de gennàrgiu, de su cincu a s’otu, su Ces at acasagiau atòbius de aprofundimentu, in prus de sa presentada de totu is startup presentis, cun atentu fintzas a is oportunidadis de su programa Horizon Europe po is startup. Intra de is aziendas italianas innovativas, sa bellesa de dexi lompiant de Sardìnnia.
Donniuna at presentau tecnologias innovativas in setoris de importu po su mercau internatzionali, comenti a sa seguresa informàtica e de is benis materialis, sa realidadi aumentada, s’intelligèntzia artifitziali: aplicatzionis sèmpiri prus capassas de elaborai cantidadis mannas de datus, agatendi ligàminis, formulendi previsionis de cumportamentu e boghendi a campu sa manera mellus po allixerai is protzessus e arresparmiai energia.
Sardigna Chircas, ghiada de su diretori generali Maria Assunta Serra, at postu a disponimentu insoru unu logu de espositzioni cumpartziu aìnturu de su padiglioni italianu in s’Eureka Park. Bieus calis funt istadas is startup e Pmi innovativas sardas seletzionadas po custa editzioni de su Ces: Alert Genius, chi at svilupau un’aplicatzioni chi donat su permissu de intrai in ambientis diferentis de atesu gràtzias a unu sistema po ponni a sa lerta, capassu de scerai personas, animalis e trastus; Athlos, chi at imbentau su protòtipu de “Smart waste management” un’infrastrutura chi ponit impari sistemas IoT e sistemas de intelligèntzia artifitziali po averiguai comenti is tzitadinus nci fùliant s’àliga, e melliorai su servìtziu in contu de dinai e energia; Creecon, chi at pesau una prataforma po comporai e bendi traballus originalis, certificaus comenti a Nft, chi permitit de amparai su traballu de is creativus ma fintzas a is amantiosus de otenni vantàgius; Footure Lab, chi proponit servìtzius de arregorta e elaboratzioni de datus relativus a is fainas sportivas, pruschetotu po su fùbalu; LinkaLab, cun un’aplicatzioni chi analizat, gràtzias a s’intelligèntzia artifitziali, documentus e pàginas Internet valutendi sa coerèntzia cun is obietivus de svilupu sustenìbili inditaus de s’Agenda 2030; Radoff, chi stùdiat solutzionis po ridusi s’imbrutamentu de s’àiri in logus serraus cuntrollendi is livellus de gasu in s’ambienti e incarrerendi un’atzioni de bonìfica candu is livellus àrtziant meda; Smart Geo Survey, chi donat agiudu a s’impreu de s’àcua in sa laurera e in s’indùstria, impitendi unu drone capassu de analizai is terrenus; Sprama Game Labs, chi at svilupau una tecnologia chi ammesturat is videugiogus a is giogus de mesa, cun sa possibilidadi de giogai in una realidadi aumentada; WiData cun un’aplicatzioni po s’urbanìstica chi serbit a compudai is logus prus frecuentaus de sa genti e s’impreu de is mèdius pùblicus e Xrit, cun aplicatzionis capassas de fraigai ambientis multimedialis a tres dimensionis, chi fait a spriculitai gràtzias a unu trastu po sa realidadi virtuali.
Manuela Ennas
