De custas ùrtimas dies m’amento s’iscena de su streaming.
A una parte, Bersani, su secretàriu de su PD e Presidente incarrigadu de su Cunsìgiu, faeddende pròpiu comente in Ballarò (in custu tenet rexone sa Lombardi). Argioleri, ciaciarreri, ma incapatzu de nàrrere nudda de importante. No nde fiat cunvintu mancu issu de sù chi naràat. Unu chi no est a su postu suo. Acostadu a Letta, su giòvunu-betzu. Letta, sèmpere citiu, mudu. S’isfinghe de s’aparadu, su sìmbolu incarradu, antzis, casi disincarradu, de su dogmatismu tecnocràticu chi at isciusciadu custu logu.
Però de “manca”, a su mancu provisoriamente. Comuncu, s’ùnicu a supostu suo: su silèntziu suo fiat s’ùnica imàgine bera. In sa mirada sua, custos “grillinos” sunt un’imbrùnchinu de pagu contu de una caminera chi durat dae tempus meda e, in is ogros suos, at a durare eternamente.
A s’àtera, is duos grillinos. Una, unu pagu tropu maleducada, de malu annestru meda, s’àteru, unu piciocu apicigau a s’iPad, comente chi no esseret mai crèschidu. Parvenus de sa polìtica, faghiant sa figura de s’istràngiu induna domo inue si perdet e no agatat sa genna pro nde bessire. E in sumentris nci tzacàant su comitzieddu pro is amighixeddos de “sa retza”.
Diàlogu, zero, niunu annoditzu. No si chistionàant a pari, chistionaiant a gente posta a in foras de s’aposentu inue s’agatàant.
Su nudda de su diàlogu pd-chimbistellas fiat però abbalantzadu. S’atòpiu de su nudda fiat ispainadu in totue, e in calichisiat computer o televisione si podiat bìere su Nudda. Fintzas in is smartphone a sistema Android.
Custu si narat “su streaming” piciocos, e depo ancora cumprèndere proite in s’ideologia grillina balet de prus de unu talk show calechisiat, chi issu puru ispainat su nudda in totue.
Alessandro Mongili
