Li tànkat s’oju e l’arrèsket s’alènu
Pro haer kimentadu… a sa tzoronàda,
Kansìda est sa karèna pro s’antzènu!
S’avrèskida est su kittho ‘e sa pesàda!
Simprèu ‘e kada die est kustu, oddheu!
No ‘hat atter’affìku ‘e l’akkidàre,
Fintzas s’appèntu tandho paret feu,
E no b’arrùmbat a si l’ilmeliare!
Therakku k’est de Mère e de Nadura,
Massaju kàle appùru hat in s’intragna?
S’istèggju, si no est de disaùra:
K’akkirriet sa ‘eddhia ei sa sikkàgna!
Sinkèndhet su ‘edùstu in su kuntzadu,
S’ammanitzat sa terra pro laorare,
Mère a Therakku memulad’infàdu,
Ohi sa karèna… pro l’isotzigare!
Dae sa ‘ena a su padente a… akkussortzàre,
Fùrriat si Piskeddàrtzu kun sa kàma,
Akkàbat pro s’homine… su meriàre,
Iskeltiat sa pitzinna… a dolu ‘e mama!
A bèrtula in su koddhu e akkùguddhàdu,
Medindhesi su trettu ‘e laorare,
‘e mala muta… su kelu est annutzadu!
S’apprettat su k’est ranu a isteniare!
Lòros, sesuggja, gjuale ei s’aratzone,
Su gjù ispànu… a trùvidu e manitzu,
Su kànnau trofigjadu in s’origjone,
Gai su Massaju… faghèt kòntiphitzu!
S’àffiantzàt kun lentòre e kun beddhia,
Sa kèva ki ammùntat su laòre,
Natura ingalenad’a su titthia,
Gai s’àlenat su mannu ei su minore!
‘E fresi su kugùddhu ei su gabbànu,
In poddhighes e kàvanos biaittu,
A kosintzos e ràgas de frustànu,
Ka s’astragu ‘e freartzu battit frittu!
Nàskit e pasket s’umana tzinia,
Dae sas intràgnas de sa Mama Terra,
No sind’hammèntat e, no l’est faina,
Su degogliare ebbìa… l’akkansat gherra!
Kolàdu li k’est s’annu a kimentare!
Marronat e isàrgat in s’antzenu,
Bèntulat patza e trigu pro inkuntzare,
Gai kansidu… si li parat lènu!
S’appentat sa Natura itte rekreu!
No sèmu, no bisestru o kuntierra,
Pro nèmos est fitzastra e… no b’hat neu,
Est s’homine s’istranzu… in kusta terra!
Nino Sole
