Mentres sa Sardigna e s’Itàlia bivent una temporada a domandare deretu a su Criadore de nosi ispostare indun’àteru sèculu ca custu nosi faghet tropu bregongiare, a pagu tretu de domo nostra una gherra noa est impampinende su desertu. S’àrea tuareg de unu de custos Istados post-coloniales, su Malì – criadu cun sa pinna in su paperi dae is Istados magiores coloniales frantzesos in a rena de su Sahara – at reagidu a su fallimentu de custu Istadu porcheddinu cunduna rebeldia chi a sa lestra meda at betadu prima a s’indipendèntzia e, comente indunu bisu malu, a su domìniu de s’islamismu prus estremista.
Sa Frantza, poderiu coloniale antigu de cuddu Logu, sustènnida comente in sa Lìbia dae totu s’Otzidente e de is alliados suos, in custas dies est intrada in s’àrea tuareg ki pertocaiat a su Malì, induna faina de gherra, a sa sòlita, ki lassat is giornalistas in foras e ki no est ca una de is tantis episòdios de custa gherra cuntìnua comintzada cun Bush sr in su Gulfu, in sos ’90.
Custos grupos kerent cun sa violièntzia a impònnere sa lei religiosa (shariya) comente chi esseret su salvamentu e sa solutzione de dònnia problema. In su Malì “liberadu” is “Partigianos de sa religione” e “Al qaida de su Maghrèb islàmicu”, prenos de armas furadas in is arsenales lìbicos chena prus controllu a pustis de cudd’àtera gherra abbardanada pro si nde bogare a Qadhafi, custingent a is fèminas a si coberrere cun su mucadore, atacant a is intelletuales e a is artistas, derrotant a is Mausoleos e tumbas sagradas, antigas e bellas de is òmines santos venerados localmente.
Infatis, issos s’ispìrant de s’Islam wahabita de s’Aràbbia saùdida (alliadu nostru), ki est cuntràriu a is tumbas monumentales, e infatis sustènnidos dae is Americanos contra de su Scerifu Hashemita (como custa dinastia rennat in Giordània), una borta conchistada Sa Meca e Medina in is ’20, aiant fatu distrùere a totu is tumbas de si “Cumpàngios de su Profeta”. Comente chi una seta protestante si nde pigaiat Roma e destruesset a sa tumba de Santu Pedru!
O piciocos! Labài ca custu est sutzedende a unu tretu de domo nostra no tanti prus distanti de sù ki ddoe at aintre domo nostra etotu e s’istùdiu inue arregistrant “Servizio Pubblico”. Cale est su prus beru?
Alessandro Mongili
