Is giorronalistas sardus si movint po agiudai e sutenni a is gopais e a is gomais de Sardigna 1, s’emetidora tivù in tribulia. Po custa arrexoni ant apariciau, custu domìnigu chi benit (su sexi de martzu) a cumentzai de is dexi e mesu de a merì, sa “Festa della stampa solidale”. S’atòbiu s’at a fai in bia ‘e Mameli 164, in su tzilleri lounge chi ddi nanta “I sette vizi” e chi s’agatat anch’est sa MEM, est a nai sa Mediateca de su Mediterràniu, aundi una borta nci fiat su campu de su Casteddu ainnantis e su mercau a pustis.
Arroberta Celot, arresponsàbili de Ansa Sardegna e meri de sa festa, at nau: “Sa tribulia de is traballadoris de Sardigna 1 est cosa lègia meda. De una banda nc’est sa genti chi at pèrdiu su traballu; de s’atra su de perdi una boxi de importu po abarrai beni informadus”.
Ant a pigai parti a s’atòbiu: Giosepi Mereu e Balentedda Neri, Lùtzidu Sottile, Mialina Sale Musio e Titziana Troja. Duncas mùsiga, spatàgulu e poesia. Ma solidariedadi po su prus ca s’atòbiu nascit cun sa tenta de agiudai is collegas, licentziaus e sentz”e dinai, de Sardegna 1 ma puru po chistionai de s’istadu de su giorronalismu in s’ìsula nostra, ca funt tropu a essi precàrius e cun istipèndius basciteddus.
