Ge no bufant nudda is cunsilleris regionalis sardus! Dexi litrus de àcua a pessoni cada setziada. Custa s’ùrtimu nova chi ndi bessit de sa busca a pitzus de is apaltus in su palàtziu de s’Arregioni autònoma de Sardigna. Una busca chi est sighendi Marcu Coccu, su Pùbrigu ministèriu de Casteddu.
Totu est cumentzau gràtzias a una denùntzia, lòmpia in Procura, sinnada de unu dipendenti de su palàtziu. E diaici s’intregu de abba a sa RAS est partu strambu meda a is ogus de sa giustìtzia. Custa, a su mancu, narat La Nuova Sardegna de oi. Ma su giorronali tataresu chistionat puru de un’atra cosa stramba meda: est a nai de su dinai donau de s’Arregioni sarda a is agentzias de imprenta Ansa, Agenzia Italia e Adnkronos, aundi sa primu ndi pigat prus de totu is atras.
In atrus fueddus, sa giustìtzia ndi bolit sciri de prus a pitzus de su manìgiu de dinai pùbricu ca nci funt una bella pariga de àutus aministrativus chi no parint essi aici bonus po su beni de totus. Su pròpiu balit po fintzas po Sweet Sardinia, su reality apariciau de Sardegna Promozione e chi nisciunu at biu.
