No nc’est paxi po Frantzisca Barràcciu, sa deputada europea chi dd’anti fata puru sutasegretària a sa cultura in su gubernu Renzi. Difatis, is de su “movimentu cincu isteddus” ant nau chi una motzioni de “sfiducia” est giai bell’e pronta po issa e totu. A nai sa beridadi, no connosceus su contènnidu de su paperi. Làdinas funt is arrexonis, perou: est a nai su fatu chi a sa Barràcciu dd’ant iscrita me in s’arregistru de is incurpaus po peculau, in Casteddu.
Nexi o sentz”e nexi, sa Barràcciu no depit tenni incàrrigus polìtigus de importu: custu s’arrexonu de is diputaus isteddaus. Sentz”e contai su fatu chi seus chistionendi de unu dannu a sa ministratzioni pùbrica, e duncas cuntra totu is tzitadinus. Po essi prus pretzisus, de trentatres mila francus nous. Dinai chi, po su pùbricu ministèriu, sa fèmina at spèndiu po fai còmporas po issa e totu.
De manera diferenti dda pentzant is abogaus de sa sutasegretària: po issus su dinai dd’at spèndiu po ponni benzina e andai a giru po traballai. At a essi sa giustìtzia a si fai connosci sa beridadi. Fintzas a cudda di’ no nci at a essi paxi po sa Barràcciu.
Càralu Mulas
