A ddus intendi a sa televisioni, totus anti bintu is eletzionis polìtigas italianas. Po fintzas is chi anti pigau una surra lègia che su fàmini. Ma a binci funti stètius issus sceti, is de su MoVimentu Cincu Steddus. Cosa stravanada anti fatu, bessendinci a primu partidu in Itàlia.
Ca in su panorama stantiu de sa polìtiga italiana, cosa noa est su MoVimentu. O, po mellus nai, cosa nova podit parri a is chi, sa polìtiga, sètzius ananti de sa tivù o sfollendi unu giorronali de paperi dda sìghinti.
Custu poita ca in s’Arretza est nàsciu su movimentu de Grillo. E ingunis etotu at cumentzau a s’amanniai. Ma cosa birtuali no est abarrada. Nossi. Sa genti de custu “assòtziu”, de diora at prenu is pratzas in dònnia arrenconi d’Itàlia. Sceti ca is medias (a foras de s’Arretza) sempri pagu nd’anti chistionau.
«Nosu castiaus aundi nisciunu càstiat prus – at tzerriau Grillo in una pratza prena, a cracu, de genti – poita ca boleus furriai dearerus is arrègulas de su giogu».
Diaici, a totus is cuadrus antigus chi spantaus funt abarraus in su biri a is “grichinus” lompi a su 25 poxentu, bessendi a primu partidu, ddis fiat abastau a si fai una passillada in s’Arretza o a ndi bessiri de domu po andai a biri calincunu de custus comìtzius in pratza.
Deghinò, abastau ddis fiat a oberri sa fentana, po ascurtai su cantu seguru de s’ungrullu. Poita ca sempri cantat s’ungrullu candu scurigat.
E imoi, scurighendi esti.
Càralu Mulas
