Ma a ita serbit su PSd’Az?
Passellindi po is arrugas de Boltzanu sa cida ainnantis de is eletzionis, bolit a nai cumprendi e ita est dearerus su bilinguismu in polìtiga. Totus is manifestus eletoralis funt in italianu e tedescu. In calincunu nc’est puru su Ladinu.
A bàrdia de custa polìtiga polilinguista, su SVP nc’est. Est a nai su partidu de su pòpulu tirolesu de lìngua tedesca e ladina.
Ma a ita serbit su SVP?
Su SVP tenit sa tenta de fai is interèssius de sa minoràntzia linguìstiga tedesca e de sa de lìngua ladina, po fintzas anche is parlamentus italianus. Is deputadus e is senadoris chi bandant a Romas, intrant a fai parti de su “grupu parlamentari po is minoràntzias” e de su “grupu de is senadoris po s’autonomia”.
Ocannu, gràtzias a un’acòrdiu cun su PD, is de su SVP funt arrennèscius a fai eligi cincu diputadus e cuatru senadoris: un’arresurtau stravanau, ca s’annu passau is deputadus fiant duus e is senadoris tres. Cosa mai arrennèscia in sa stòria de su partidu cun “su steddu alpinu”: noi bàrdias po sa polìtiga insoru, prontas a batallai.
Nau custu, sa pregunta chi m’acucat a conca, custa esti: poita sa minoràntzia linguìstiga sarda no tenit nemancu un’arrapresentanti polìtigu in su parlamentu italianu? No nc’est unu partidu chi potzat giogai che su SVP in su Tirolu de bàsciu?
A nai sa beridadi, su partidu nc’est. Partito Sardo d’Azione ddi nanta. Una borta ddu tzerriànt Partidu Sardu puru. Ca sa limba ofitziali de su PSd’Az (cumente narat s’istatudu cosa suu), sa lìngua sarda esti. E, a nai sa beridadi, in s’istatudu nc’est scritu puru chi su Partidu Sardu tenit sa tenta de “amparai is diritus natzionalis e individualis de su pòpulu sardu”.
Ma torraus a s’arrealidadi. Su PSd’Az no est su SVP, ca su Partidu sardu no est prus a bàrdia de is interèssius de su pòpulu sardu. Po ddu cunprendi, bastàt a si fai unu giru in is arrugas de Casteddu po si castiai is manifestus de is partidus: de lìngua sarda no nci ndi fiat nemancu s’umbra. Nemancu is de su PSd’Az: totus in italianu.
Ma a ita serbit unu Partidu Sardu chi grisat sa lìngua sarda? A ita serbit su PSd’Az? Bai e circa.
Càralu Mulas
