Domìnigu su tres de martzu is deputadus e is senadoris de su MoVimentu Cincu Steddus funt andaus in Romas, aundi si funt atobiuas totus imparis. Intr’‘e issus, is grichunus sardus puru nci funt. Ca in Sardìnnia, che in atras regionis italianas, su partidu istelladu, arribau primu esti.
Ma chini funt is parlamentaris nous chi ant a essi sa boxi de s’ìsula in Terramanna? Cumentzaus de Manuela Serra chi est sa primu senadora sarda. Eja, ca nci boliat su MoVimentu de Grillo a betiri una fèmina sarda in su Senadu italianu, cosa chi, fintzas a oi, is atrus partidus no iant bòfiu o no fiant arrennèscius a fai.
Manuela Serra tenit cuarantun’annus, bivit in Casteddu i est maista de scola in Pula (in sa meria de Casteddu). Traballat cumente educadora, ca s’est laureada in Scèntzias de s’educatzioni, cun is pipias e is pipius chi, de prus, tenint abisòngiu de agiudu. De diora fait parti de su MoVimentu. At nau ca eja, a essi sa primu in s’arrolu po su Senadu in Sardìnnia, ca creit chi si potzat fai polìtiga cun is manus lìmpias.
Ma a su Senadu Manuela Serra no at a essi sola. Ca, imparis a issa, Arrobertu Cotti nc’esti. A issu puru, difatis, dd’anti mandau a Palàtziu Madama. Est a nai, su segundu senadori istellau est issu. Casteddaju, tenit cincuantunun’annus e traballat che spertu de turismu e bagàntzias. Sa ghia turìstiga puru fait. Infogau po sa bicicreta, est unu de is criadoris de s’assòtziu po s’adelantamentu de sa “pista cicrabili” in Casteddu.
Cuatru, imbecis, funt is deputadus a sa Càmera (o Aposentu, chi boleis): Emanuela Corda, Andria Vallascas, Pàula Pinna e Nicolau Bianchi. Emanuela “Manù” Corda tenit trintases annus, est casteddaja e traballat cumente gràfiga e disenniadora. Su MoVimentu dda iat giai candidada a sìndigu de Casteddu me in is ùrtimas eletzionis comunalis.
Andria Vallascas, de Casteddu, tenit trintaset’annus e ingennieri esti. De su 2010 fai parti de su Meetup Casteddu Cincu Steddus. Po cantu spetat a Pàula Pinna, tenit trentot’annus e de Cuartùciu esti. S’est laureada in economia. A dd’acabai cun su gastu de su dinai pùbrigu e su “rèdditu po is tzitadinus”: custas is cosas prus de importu po issa.
Nicolau Bianchi tenit trentaduus annus e ndi benit de Sènnaru (o Sènnari, cumenti nant puru). Traballat in Tàtari che spertu de informàtiga. In su 2011 ddu iant giai botau a cosilleri in su Comunu de sa Romàngia: su primu consilleri a cincu steddus de sa Sardìnnia.
