De su 16 a su 20 de gennàrgiu, comenti dònnia annu, s’est tentu su World Economic Forum (WEF) de Davos. Me is mèdius massivus s’editzioni de ocannu at arreciu prus pagu atentu de cussas de is annus passaus, ca no ddoi fiant medas personalidadis mannas comenti àtera bortas. S’est chistionau pruschetotu de calincunu interventu. Po primu de cussu de su Presidenti ucrainu Zelensky, in dereta videu, chi at pediu a s’ocidenti de agiudai de prus s’Ucraina. A sighiri, de cussu de sa diretora generali de su FME Kristalina Georgieva e de cussu de sa Presidenti de sa BCE Christine Lagarde, chi ant stèsiau is timorias in contu de su stadu de s’economia globali, chi po issas ocannu at a sunfriri, giai, ma no cantu si timiat finas a pagu tempus fait. S’ùrtima dì Greta Thunberg at liau s’iscena a totus, ca impari a calincuna dexina de àterus ativistas at manifestau po su clima incurpendi is chi pigant parti a s’atòbiu, “is potentis de sa Terra”, de essi cussus chi funt ruinendi su praneta.
Ma ita est su Forum de Davos e poita tenit totu custu importu? Su WEF dd’aparìciat un’organizatzioni privada nàscia in su 1970 po voluntadi de s’economista tedescu Klaus Schwab. Sa tarea est cussa de fai atobiai presidentis de Stadus e primus ministrus, polìticus, presidentis de bancas centralis, ghias de is aziendas prus mannas, industrialis, milliardàrius, studiosus, professoris universitàrius, ma puru sportivus, atoris, cantantis. Totus custus personàgius s’agatant impari, a sa fini de su mesi de gennàrgiu, in custa bidda Svìtzera de 11.000 abitantis posta a 1.500 metrus de artària in mesu a sa nì de is Alpis. De is annus ’70 a oi su Forum est mudau. Me is primus tempus fiat pruschetotu unu logu po discussionis acadèmicas de studiosus; is polìticus e totu is àterus funt arribaus a bellu a bellu. S’idea de is chi portant a innantis su Forum est cussa de un’economia chi favoressat sa globalizatzioni, e po custa arrexoni Davos est finiu asuta de is contestatzionis de is movimentus contràrius a custa àndala econòmica, chi me is annus ‘90 fiant de manca – is “no global” – e oi funt de dereta – is chi naraus populistas e sovranistas -. Is amantiosus de “s’ idea de su cumplotu” arribant a biri in su Forum una gènia de Spectre a sa moda de is pellìculas de James Bond, innui is “meris de su mundu” cua-cua decidint dònnia cosa ddis potzat serbiri po fai prus dinai, finas cosas malas comenti cumentzai gherras o impestai sa Terra de apedèmias.
Sa beridadi est chi Davos est un’oportunidadi, po is protagonistas de s’iscena polìtica e econòmica mondiali, po arrexonai in contu de su presenti e de su benidori. Dònnia annu su Forum proponit un’allega primàrgia e me is cincu diis de traballu is chi ddoi pigant parti cumpartzint ideas e solutzionis po is problemas de su mundu. S’allega de ocannu fiat “Coperatzioni in unu mundu partziu”. Giai su tìtulu fait cumprendi s’atentu postu asuba de sa situatzioni internatzionali de oindì, chi in economia ponit sa pregunta chi sa globalizatzioni siat in crisi o nono.
Comenti dònnia annu, prima de su cumentzu de su Forum, s’Oxfam international, un’ONG de primori chi traballat po redusi sa disagualidadi in su mundu, at imprentau s’ùrtimu arrelatu suu, cun su tìtulu “Sa disagualidadi no connoscit crisi”, chi pintat unu mundu chi fait pensai chi sa sceda a sa pregunta siat eja. S’apedèmia, is giambamentus climàticus, is prètzius de s’energia e s’inflatzioni ant fatu cresci in manera spantosa is diferèntzias intra de arricus e de pòberus. Segundu su stùdiu, de su 2020 s’1% de is prus arricus si funt fatus meris de su dòpiu de sa crèscia de sa richesa de su mundu cunfronta a s’àteru 99% de sa populatzioni mundiali. In su mentris chi sa richesa de is milliardàrius crescit de 2,7 milliàrdus de dòllarus a sa dì, is guvernus de is Stadus prus pòberus spendint, po torrai su dèpidu pùblicu insoru, cuàturu bortas cantu spendint po sa sanidadi e dònnia cuàturu segundus una persona si morit ca no tenint curas.
Su chi est bèssiu a pillu de su Forum de ocannu est chi sa globalizatzioni at bìviu diis prus bellas de cussas chi est bivendi oi. De seguru medas curpas funt de sa gherra in Ucraina, chi at torrau a partziri su mundu in duus. Ma sa curpa de s’arrocu de is processus de globalizatzioni no est sceti de sa gherra. Stadus Unius e Cina funt faendisì de tempus una gherra cummerciali, artziendi is tàscias doganalis a is produtus chi unu Stadu bendit a s’àteru. In prus, me in s’Unioni Europea e me in Amèrica funt faendi a gara po chi donat prus agiudus a s’indùstria pròpria. Cosas, custas, chi funt contràrias a dònnia idea econòmica liberali e duncas a sa matessi idea de globalizatzioni. Su 2023, parit cosa certa, at a essi un’annu de recessioni a livellu globali, cantu manna no si sciit. Forsis po no depi donai scedas o po no sciri ita scedas donai, ocannu medas presidentis e primus ministrus funt abarraus atesu de Davos, ca a ddoi andai podiat essi perigulosu. No ddoi fiant ni Biden ni Xi Jimping, ma nimancu Macron, Sunak, Trudeau o Lula. De is primus ministrus de su G7 s’est biu sceti su tedescu Scholz. De s’Itàlia su polìticu prus de importu presenti fiat su Ministru de s’Istrutzioni Valditara, chi po un’atòbiu econòmicu no est chi fessat su chi andàt prus beni po arrapresentai su Guvernu.
Massimiliano Meloni
