In Ùsini, custu mèrcuris colau de a merì, unu cani at mussiau in sa trempa una fèmina de 74 annus. Sa bèstia est unu rottweiler, fuiu de sa domu de unu bixinu lassada oberta.
De cust’acontèssiu nd’at torrau sceda La Nuova Sardegna, su cotidianu tataresu, oi e totu. A sa giubilada dd’ant betia a su spidali, mentras su serbìtziu vitirinàiu de sa Asl at portau a càstiu su cani po cumprendi cantu perigolosu est e duncas ddu sercuestrai.
Su meri de su cani arriscat una denùntzia po “càstiu mancau”. Parit perou chi no siat sa primu borta chi su rotweiler mussiat calincunu cristianu.
