In Ulassa sighit sa cassa a s’òmini chi nd’at bociu a Antoni Cossu, su giubiladu de setantaxincu annus, agatau su cuìndixi de su mes”e friàrgiu de ocannu, mortu cun duus stampus in conca. Is carabineris de Jersu, duncas, sighint a fai preguntas a sa genti, e a scruculliai domus e pinnetus in bidda e in su sartu, e po fintzas in atrus logus de s’Ogiastra.
Difatis a s’òmini, no nc’est duda peruna, dd’ant bociu cun duas scupetadas a balla. Su chi sa giustìtzia depit cumprendi mellus ancoras est sa càusa de sa morti de su tziu de Ulassa: dd’ant bociu a posta o po ismarru?
