“Potzu cumprendi s’infogu de sa Barràcciu po Casteddu, chi s’est posta in lista po ndi bessiri a capitali de sa cultura europea in su 2019. Ma custa gara, chi totu is tzitadis funt faendi de manera onesta e sintzilla, tenit una tenta làdina e crara: sa de ndi stretanxai progetus e bideas de balori e de grandu importu. Po custu creu chi, a s’acabu, sa mellus tzitadi depat binci”.
Custus is fueddus de Màssimu Zedda chi torrant a pigai is de su sìndigu de Ravenna. Una cuntierra chi sighit, duncas, a pustis de is fueddus de sa sutasegretària a is benis curturalis de su gubernu Renzi chi at prumissu s’agiudu cosa suu a Casteddu po binci custa gara de importu mannu.
“Tocat a nai chi su Ministèriu, comuncas, no tenit custu poderi ca su scioberu ddu at fai una truma de spertus, chi depint castiai a sa bonesa de is progetus e de is bideas: custu su chi s’interessat dearerus. A su Ministèriu pedeus s’agiudu po Italia 2019: su progetu chi bit is bintunu tzitadis italianas imparis. Spereus, duncas, chi potzat binci su mellus progetu. E nareus puru chi Casteddu at a agiudai a sa tzitadi italiana scioberada in custa gara po eligi sa capitali de sa cultura in Europa” at nau a s’acabu Zedda.
Càralu Mulas
