Amazon oberrit una seu in Casteddu, sa de tres in su territòriu italianu. Si ddu at fatu sciri po primu Davide Fara, in un’artìgulu pubricau pròpiu in is pàginas de Sardinia Post. Ma ita est Amazon?
Dd’at criada Jeff Bezos, òmini lestru de cumprendòniu, de cussus chi arrennescint a cumprendi, ainnantis de is atrus, e cumenti su mundu at a furriai.
A su cumentzu fiat una butega litròniga de librus, che atras in su panorama nou de s’e-commerce.
Is annus Norantas fiant. In Amèriga seus. Jeff Bezos at cumprèndiu chi, su de comporai e bendi librus on-line, no est unu machìmini chi at a sparessi a sa lestra. In atrus fueddus, no est una moda. In Amèriga, sa pàtria de Steve Jobs, Michael Dell e Bill Gates, is computer bintrant in is domus e in is logus de traballu. Su tempus po andai a fai còmporas est sempri prus pagu. Ma, gràtzias a s’arretza, donniunu podit comporai su chi bolit candu bolit.
Acantu a is librus arribant CD de mùsiga, videogames, DVD. Ma no est totu, ca sighint bistiris e butinus, e is cosas tennològigas. Chi si fessit firmau a sa bèndida de custas cosas, Amazon iat a essi stètiu unu e-store che is atrus. Mannu e poderosu ma, prus o mancu, oguali a is atrus.
Diaici Jeff Bezos ndi bogat a pillu un’atru machìmini chi nisciunu nci crediat dearerus: su Kindle, unu ligidori digitali de librus litrònigu. Est a nai unu eBook Reader o, chi boleis, unu eReader.
Su 2007 fiat candu sa primu generatzioni de Kindle ndi bessit in su mercau ameriganu.
«Macu – ddi iant nau – sa genti no at a ligi librus litrònigus. Figura-dì. E chini iat a essi su scimpru a umperai cuss’arratz’‘e cosa po ligi? Ma ba’».
In su 2012 su Kindle est lòmpiu po fintzas in Itàlia. A sa de cincu generatzionis seus imoi. Ndi funti bendendi aici meda chi tocat a si ponni in fila po ddu arriciri a domu. Stravanau.
Macu ddi naranta. Aici macu, chi imoi Amazon oberrit una seu po fintzas in Casteddu. Chi no est machìmini custu…
Càralu Mulas
Progetu realizadu cun sa partetzipatzione de sa Regione Autonoma De Sardigna L.R. 26/97 subra sa limba e sa cultura sarda
