Est acant’a acabai sa circa a pitzus sa strasura chi su 18 de su mes”e donniasantu at fatu mortus e dannus in Terranova e in totu su cabu de susu. Ariseru a mengianu in Tèmpiu Domìnigu Fiordalisi, su Procuradori, e Arricardu Rossi, su Sostitudu procuradori, si funt atobiaus anche sa seu de is carabineris, is cunsultadoris chi funt traballendi a ingìriu de su chi est acontèssiu in cuddas dies de pròida manna.
Tres funt is buscas obertas in custus cuatru mesis chi ant a depi fai cumprendi cumenti est stètiu possibili chi 13 personis apant pèrdiu sa vida. Po imoi no si scit nudda de seguru, ma podit essi puru chi ndi bessant a pillu novidadis mannas e po fintzas chi àterus nòminis bengant iscritus in s’arregistru de is indagaus.
